مصر و الجزائر

انا متكلمتش عن العك و المهزله اللي حصلت من الجمهور الجزائري ضد جماهير المصريين في السودان غير الشقيق لان الموضوع مكشوف للناس و ما اكثر الكليبات علي اليوتيوب .

بس الفكره انه في حاله الغضب التي تجتاح الشعب المصري بسبب اللي حصل نلاقي ان الغضب الرسمي من الحكومه و البرلمان و الرئيس نفسه تعبر عن حاله من اللامبالاه تجاه الشعب.
مجرد خطب رنانه و وعود و اكاذيب بشان ان كرامه الانسان المصري من كرامه الدوله المصريه و هراء من هذا النوع المفضوح لدي الشعب الان.

ايه المطلوب مننا عشان نتحرك كان لازم يتقتل مننا حد عشان نتحرك ؟
كان لازم علاء او جمال مبارك ينضربوا عشان نتحرك ؟
كان لازم الرئيس يتشتم باهله عشان نتحرك ؟

في 100 كان و لو ممكن تحصل.

النهارده في البيت بيتك اعتقد بدات حمله امنيه بتهدئه الاوضاع

محمود سعد بيطالب اعلامي الرياضه في مصر بتهدئه الاوضاع بداعي انه عادي و بتحصل

ليه يا استاذ محمود لو كان ليك اخ او اخت او زوجه هناك و حصل ده ليها كنت هتقول كده برضه ؟
اكييد لا ولا الف لا للاعتداءات الجزائريه علينا .

احنا بنطالب بحقنا و في حدود المعقول ايضا
عايزين وقفه مع كل اللي بيعاملونا بهمجيه
مش عايزين نطاطي لحد بعد كده
اللي يقل ادبه نديله علي دماغه هو مش ماسكين علينا ذله زي ما علاء مبارك قال.

احصنه السكه الحديد

صرح مصدر وصف بالخبير في اهرام الثلاثاء الموافق 3\11\2009 بالتالي :-



السكه الحديد (يقصد القضبان) لا تستحمل قدره الجرارات الامريكيه الجديده لقوتها المفرطه البالغه 4250 حصان


ده كان في مجمل كلامه عن سبب ان الجرار اكتسح عربات الغلابه و بيقول ان الجرار الامريكي وزنه 420 طن مع زياده 60 طن بسبب السرعه , عشان كده الجرار اكتسح العربيات اللي قدامه.


هذا وقد طلبت قضبان السكه الحديد من المحامي الكبير بدر النوساني برفع قضيه خلع علي الجرارات الامريكيه الجديده لانها تخاف الا تقيم حدود الله.

العياط 2009 كلاكيت تاني مره

كلنا طبعا سمعنا كلام كتير عن حادثه قطار العياط اللي راح ضحيتها 18 غير المصابين . و طبعا سمعنا عن اعلانات الحكومه عن تطوير القطارات و السكه الحديد و الـ 8 مليارات جنيه اللي راحوا للقطاع المهم ده في بلدنا .

بس في حاجات عايز اقولها و في نفسي :-

1- ليه لما حادثه زي دي تحصل اول حاجه يلقي القبض علي سائقين القطار ( اوي حتي سائقي السيارات ) و توجه علي طول تهم من نوع القتل الخطأ و اضرار بملكيه عامه و و و و .......

هل السائق متعمد انه يعمل حادثه و لا حاجه ( صحيح انا مع حبس سائقي الميكروباص لانهم يستاهلوا ) هل يقصد الانتحار , ليه يتعامل كانه مذنب و يتقبض عليه و يتحط في زنازين مع المجرمين و القاتلين و تاجري المخدرات و هو في الاخر اغلب من الغلب نفسه .

2- السيد الوزير محمد لطفي منصور اعلن انه في 34 من قيادات السكه الحديد احيلو للتحقيق .

ليه هما اللي كانو السبب ان قطرين يخبطوا في بعض ليهم تار مع الشعب مثلا و التحقيق ده ايه نوعيته بالظبط و في الاخر ايه اللي هيحصل معاهم لفت نظر , جزاء و لا قضاء و قدر .

3- السيد الوزير محمد لطفي منصور في حديث مه البيت بيتك تاني يوم الحادثه مع تامر امين و دكتور جامعي لا اذكر اسمه طالبه بتقديم استقالته .

الوزير هاج و ليه استقيل و انا ذنبي ايه ( طب ما المسئولين بتوع السكه الحديد ايه ذنبهم برضه ) و احنا طورنا و احنا سوينا و معدل الحوادث قل من 2005 و انجازتنا و عمايلنا و مشكل حاجه تحصل الوزير يستقيل ( ما في برضه ناس معندهاش دم زي وزير التربيه و التعليم )

و في الاخر يطلع يقول انا بستقيل لاحساسي بتحمل المسئوليه السياسيه

ايه اللي غير مفهوم الوزير من يوم و ليله اكيد وصلته رساله من نوع ( احنا قبلنا استقالتك ) .

عايز بقي الناس تشوف مستوي القطارات في الاقاليم اكاد اجزم ان كلها متنفعش لنقل الحيوانات و عموما مثلا من الانواع

قطارات بدون نوافذ تماما و قطارات مظلمه ليلا بالكامل يسهل فيها السرقه و الاغتصاب و المحرمات كلها .

و في النهايه احب اقول لكل مواطن و كل مواطنه ( بلدنا بتتقدم بيننا و من اجلك انت )

مول سيتي ستارز من الجو

استطعت و انا راجع من السفر و اثناء عمليه الهبوط بمطار القاهره يوم 20-10-2008 تصوير مول سيتي ستارز .

و يظهر بالصوره ايضا دار الدفاع الجوي بالنزهه يمين الصوره.

الصوره تعتبر من حقوق الملكيه و لكن من يريد استخدامها فقط يذكر اسم صاحبها.

احنا طبعنا كده

بنحب نبيع نفسنا للي هيدفع اكتر و ندلل علي نفسنا و نخلي الناس كلها تعرف.
اكن معدش في كرامه عند الانسان المصري لدرجه ان الناس كلها بتتكلم علي اللي اتباع بيه و الفلوس اللي هيقبضها.
سيرته بقت علي كل لسان سواء بالحلو او بالسوء.
شريف عبدالفضيل
طبعا بعيدا عن اي انتماء لاي نادي من اللي بيبوظوا الكوره في مصر
انت طلعت مش كويس خالص.
يعني ايه لما تتفق مع ناس و تقعد معاهم اكتر من 7 ساعات و هناك شبه اتفاق بين الطرفين علي كل حاجه عايز مليون ونص خد مليون و نص , مش عايز تدفع الضرايب مش هتدفع ضرايب , عايز اعلانات اكيد هنشوفلك اعلان سمنه تطلع علي صفحيته.
و في الاخر بعد ما تتفق تديهم بمبه و تقفل تليفونك و تطنشهم و تسقع دماغك مش عايز وش.

هو لو اي حد بيشتري حاجه خليها عربيه مستعمله من تاجر و جنبه تاجر زيه و عندهم نفس العربيه و رحت علي واحد و قعدت معاه و قعد يتفق معاك علي كل حاجه و في الاخر التاجر اللي جنبه بيعتلك رساله يقولك تعالي و هنزل عن سعره الف جنيه.
طبعا عشان مصريين هتقوم جري تروح للارخص حتي لو كانت عربيته تعبانه.

طب الراجل اللي انت قعدت معاه هيقول عليك ايه , طيب انت مش خايف من كلام الناس باللي انت عملته دي حركه نص كم اوي .
انت لو حتي لعيب حلو الناس عرفتك علي حقيقتك بتدور علي 150 الف زياده.
مش مكفيك انك كاسر المليون
طب سؤال لو انت مخلص جامعه اصحابك بيعملوا اد ايه في السنه دلوقتي عشان تتنطط كده.
اكيد و لا حتي نص في الميه من اللي انت هتعملوا او عملتوا في الاسماعيلي.

ليه الناس بقت مبتخافش علي شعور الناس التانيه.
ليه اللي شايف نفسه قوي بيحب ياكل الضعيف .
ليه احنا طبعنا كده؟!

الاهلي و حرس الحدود

ليا تعقيب بسيط علي مباراه السوبر المصري بين فريق حرس الحدود (المصري) و الاهلي (المصري) برضه.

تعقيبا علي عدم طرد احمد عيد عبدالملك عايو اعرف هي لمسته دي للاستاذ احمد السيد (سوابق جنائيه) تعمل فيه كل اللي عمله علي الارض و توقعه بالمنظر ده . نصيحه لاحمد السيد (كل لافاش كيري او بريذدن كتير عشان الكالسيوم او طعمه ملك ارخص برضه)

لما احمد السيد جه ينطرد ليه مكانش عاجبه هو مش ضربه بالكوع و لو كانت لبست صح في وش عيد كان زمانه طالع بغرز , و ليه كابتن الاهلي و هو طالع عمال يشتم و يسب.

انذار احمد عبدالغني و تمثيله علي حسب راي الحكم لو كانت للقاتل المبتسم كانت اتحسبت و لأ , وبعدين هي ضربه جزاء صحيحه ميه بالميه.

جون الاهلي الاخير سليم تماما

القصه التانيه بقي
كل القنوات الفضائبه عماله تحلل ليه الاهلي خسر امبارح و كان المفروض يعمل ايه عشان يكسب و ايه المطلوب منه المرحله القادمه
و الروشته اللي المفروض الاهلي يعملها عشان يرجع
اكن فريق حرس الحدود جاي من اسرائيل و لا حاجه عشان يعملوا كده .

ايه ام الاعلام ده عمال ينفخ في الاهلي و اللي جابه الاهلي و الحرس المفروض مكنش يكسب و عمالين ياكدوا علي اول مره في تاريخه
انه بيكسب بطوله

مين اللي كان احسن في الماتش ده الاهلي و لا حرس الحدود

الاهلي ضيع فرص كتير ماستفادش منها ليه

طول ما الاعلام الرياضي بالشكل ده احنا هنفضل ورا خالص مفيش ديموقراطيه حتي في الاعلام الرياضي , كله ورا لاهلي و الزمالك و الباقي كومبارس

بالدليل برضه

يوم السبت اللي فات في جرنان اخبار اليوم بتاريخ 18-7-2009
في اول صفحه من الملحق الرياضي خبر بحجم نصف صفحه و صوره لحسام البدري و عناوين و اراء و اخبار عن لاعبي الاهلي
مش عارف مين دخل الحمام و مين عنده امساك و التاني اسهال و ده هيخطب الجمعه الجايه و ده هيطلق و حاجه تشل اللي بيقري
في المقابل بعد 5 صفحات من الخبر ده تقريبا خبر للحرس و استعداده للبطوله دي لايتجاوز 10 سطور و جنبه من الناحيتين اعلانات.

فين بقي العدل و الدميوقراطيه

انا لا بشجع الاهلي و لا الزمالك و مبحبش الحرس , انا بشجع غزل المحله و بس !

بس لما تبقي المواقف و في تفرقه بين الفرق بالمنظر ده يبقي اكيد في حاجه غلط و اكيد طبعا انت في مصر.

تامر امين ليلتها بعد الماتش قطع في الحكم و عمال يبرر ليه الاهلي مكسبش علي اساس برضه ان الحرس الاسرائيلي اللي بيلعب مش فريق مصري.

سيد عبدالحفيظ اللي مفكر نفسه اعلامي و لا حاجه في قناه الاهلي قطع الحكم بين الشوطين و بيتكلم انه محكمش من زمان في الدوري

طيب ما الحكم ده ليك و عليك برضه ايه المشكله

هو مكنش منحاز اوي كده عشان الحرس يكسب

اخطاء هنا و اخطاء هناك .

الكوره في مصر مش هتتصلح الا لم الاعلام يتصلح هي مش فلوس بس

يعني لو في هاله اعلاميه حول غزل المحله و بيلاقي اللي بيدافع عنه مثلا و لاعبييه بيعملوا حوارات و مقابلات و اخبارهم معروفه مش هيحتاجو يروحوا الاهلي او الزمالك.

انما اللي بيحصل غير طبيعي خالص.!!!!

الشعب المصري

اعتقد ان اسهل شعب ممكن يتحكم في العالم هو الشعب المصري الوفي الجليل التي تظهر معادنه عند الشده!
فعلا هي حاجه غريبه نتميز بها عن باقي الشعوب العربيه منها و العجميه و البربريه ازاي...
يعني بصراحه من وجهه نظري ان اي مسئول يقول للشعب يمين يبقي يمين شمال يبقي شمال ارمي نفسك في البحر يقول حاضر و طبعا مهما وصلت درجه استبداد المسئول تجاه افراد المجتمع.
تلاقي مثلا الناس في حي فلاني بيكرهوا رئيس الحي و يمكن ميعرفوش اسمه (انا لا اعرف اسم و شكل رئيس حي ثان المحله الكبري مع العلم ان بيني و بين الحي بتاع 500 متر)
و ساعه ما الراجل يظهر في الشارع تلاقي الناس ملفوفه حواليه و عماله تشتكي و هو بيوعد بالحل.
ده ممكن بيحصل مثلا مع موظف صغير بالدوله رئيس حي او رئيس مدينه امال لو وزير و لا رئيس وزراء و لا رئيس جمهوريه!!!!
النفاق بقي سمه من سمات شعبنا الواعي صاحب الضمير اللي بيعرف يختار رئيسه و اللي بيمثلوه في مجالس الامه
تلاقي الكل بينافق الكل رئيس الحي بينافق رئيس المدينه و رئيس المدينه بينافق المحافظ و هكذا تكتمل الدائره حتي رئيس الجمهوريه لغايه ما الناس تصدق اللي بيحصل و ان الشعب مرتاح و كله عال العال و طبق الكشري بنص جنيه.
بصراحه انا مش مرتاح يعني صحيح ماديا اكون يمكن مرتاح
لكن نفسيا من اللي بشوفه في الشارع في التلفزيون خنقني
لما ممتاز القط ينونو ان مصر تعيش ازهي عصور الديموقراطيه ده يبقي ايه
لما احمد شوبير يقول ان سبب وكسات الزمالك مرتضي منصور ده يبقي ايه
لما اقرا في الجرنان ان ضربه معلم انقذت الاقتصاد من الازمه الماليه العالميه و ان اقتصاد مصر امن و بعدين يرجعوا يقولوا اكيد احنا هنتأثر ما احنا جزء من العالم ده يبقي ايه
لما الشارع يبقي منفلت امنيا و خناقات علي اللي يعدي الاول و سب الدين و المله للناس ده يبقي ايه
لما نصدر غاز لاسرائيل و اتفاقيه كويز ده يبقي ايه ( اكن السادات لو كان عايش كان هيسيب المهزله دي تحصل )
لما , لما , لما , لما , لما , لما , لما , لما , لما , لما , لما , لما , لما , لما , لما , لما , لما , لما , لما , لما , لما , لما , لما
ده كده يبقي عايشين كويس
لا لا لا لا لا لا لا لا لا لا
للاسف احنا مش عايشين خالص

القله المندسه

ليه كل حاجه تحصل في بلدنا كبيره نحب نصغرها.

ليه اي اضراب او اعتصام كبير نقول عليه شويه عيال و قله لا تعبر عن راي الاغلبيه.

ليه لما الجمهور يشتم الزمالك و اللاعبين بيقبوا قله مندسه وسط الجمهور الحقيقي الوفي المخلص الخ الخ الخ.

المفروض الواحد لما يدي الحاجه حجمها الطبيعي يقدر يبني عليها قرارات سليمه تقدر في النهايه توصله للمطلوب منه

يعني اذكر هنا كذا مثال عما بداخلي

الاول

اضراب عمال غزل المحله في السادس من ديسمبر 2006 ان لم تخونني الذاكره , اكثر من 20 الف عامل و موظف اضربوا عن العمل و اعتصموا داخل مقر شركه غزل المحله

و قتها و بحكم قرب سكني من الشركه واطلاعي علي بعض الاخبار من جهات امنيه صديقه عرفت انها مشكله كبيره حيث يعتصم 25 الف عامل مطالبين باسقاط رئيس مجلس الاداره و زياده البدلات و الحوافز و المرتبات لتواكب ارتفاع الاسعار.

شئ طبيعي ان يعتصم الافراد في مواجهه ظروفه الصعبه و يقهرها

ساعتها قريت لعميل الحكومه حسين مجاور بالاخبار ( اللي ماجبتش سيره خالص عن الاضراب الذي استمر 7 ايام )

بعد الاضراب و حل المشكله انه لا توجد مشاكل بالشركه و كله تمام و العمل علي قدم و ساق و ان اللي حصل ده شويه قله منحرفه مندسه لا تعبر عن راي العمال و لا يزيدون عن 500 فرد اتجمعوا و روحوا خلاص بيوتهم!!!!!!!!!!!!!!!

الثاني

كان برضه بمدينه المحله و لكن بقي يوم 6 ابريل صحيح ان العمال ما اشتركوش بالمظاهرات بس التصريحات الامنيه بالاخبار قالت انهم مجرد قله مدسوسه حوالي بتاع كده 1000 واحد و لمينا الموضوع في حين انه كان اكثر من 20 الف متظاهر كلهم من البلطجيه و الحراميه.

الثالث

مشهد كروي بيشتم فيه الجمهور نادي الزمالك و لاعبيه و رئيس النادي و مديروه يطلعوا يقولوا ام الكلمتين دول شويه عيال و قله مندسه و منحرفه كمان و ان جمهور الزمالك الوفي ميطلعش منهم الكلام ده علي اساس ان لسه في حد بيشجه الزمالك.

الفكره زي ما قلت لازم كل حاجه تاخد حجمها لا تزيد ز لا تقل عشان نعرف نحلها مظبوط و نقدر ناخد قرارات صحيحه.

و سؤالي هو ليه احنا مش هنتغير ابدا

كل مشكله تحصل شويه شباب مندس و عميل للخارج انه خارج ده , عملاء لاسرائيل مثلا ما احنا زي العسل معاهم و غاز و سياحه و رحلات طيران بينا و بينهم و كله زي الفل و تمام يا زعيم

كل حريقه تحصل يبقي ماس كهربائي

كل حادثه علي الطريق السريع تبقي سرعه جنونيه علي اساس ان احنا عندنا طرق

كل واحد يموت هو مراته في الحمام يبقي تسرب غاز اكن مصر كل رجالتها و ناسوينها بيستحموا مع بعض كل يوم

اه و نسيت كمان لازم يكونوا ساعات عروسين

كل ما واحد يروح يشتكي لمسؤول يبقي مختل عقليا زي الراجل بتاع احمد فتحي سرور

احنا مش هنتقدم و لا حاجه كلها شعارات للبقاء علي نفس الكراسي اللي عايزه تتغير من زمان الا اذا غيرنا احنا كشعب طريقه تفكيرنا.

الارصاد الجويه

كان زمان الاخبار كانت بتتريق من خلال كاريكاتير مصطفي حسين و احمد رجب علي الارصاد الجويه اللي مبتصدقش ابدا.
يا اما الجو يكون برد و يطلعوا يقولوا في نشره 9 الجو صحو و ربيعي معتدل علي جميع الانحاء.
يا اما الجو حر و الناس زهقانه و يطلعوا يقولوا الجو لطيف علي جميع انحاء الجمهوريه.
لكن
اليومين دول بقت بتصدق كتير و تطلع تقول كلام مظبوط عن درجات الحراره المتوقعه و حاله الجو
هنا السؤال
ما هو الاختلاف بين الان و الماضي في ذكر المعلومات الصحيحه؟
هل بسبب القنوات الفضائيه المختلفه التي تذيع حالات الجو يوميا
هل السبب هو الترفيه عن الشعب و عدم العكننه عليهم
هل السبب امن الدوله!
عن طريق نريح الشعب و نسمعه اللي هو عاوزه.

حاجه تانيه ............ لازم نغير مقوله حار جاف صيفا دفئ ممطر شتاءً
لان خلاص معدتش بتدخل علي حد و بالذات الاطفال اللي في المدارس
يعني الجو بقي نار في الصيف و معدتش تقدر تقعد من غير مكيف و متقدرش تمشي في الشارع 5 دقائق تحت الشمس الحارقه
و في الشتاء احنا دلوقتي في عزه و الجو برد خالص و معدتش ممطره زي الاول

عمليه العميد ميت

اعلن اليوم و انا في كامل صحتي و قدرتي النفسيه و العصبيه عن انضمامي لـ عمليه العميد ميت الارهابيه شديده الخطوره علي امن المجتمع و سلامه اراضيه

هذا و قد فتحنا باب التبرعات و الانضمام للخلايا الجديده و التدريب علي القتال بالاسلحه البلاستيكيه شديده التدمير المحرمه دوليا

و علي من يحب ان ينضم للجماعه انضم للجروب التالي

http://www.facebook.com/group.php?gid=121692445540

من توابع فرستي

امبارح الموافق الخميس 5-2-2009 راجع من المنصوره الي المحله الكبري في حوالي الساعه الثانيه و النصف و في مطلع كوبري علوي عند قريه الراهبين حصلت حادثه ميكروباص بسياره لانسر و الله اعلم ايه اللي حصل للناس.
المهم الكوبري وقف من الناحيتين و لما اتفكت شويه جاي انزل من علي الكوبري الاقي سواق حيوان ابن ... ابن ..... جاي في المخالف و انا نازل من علي الكوبري عشان الناحيه التانيه واقفه بسبب الحادثه.
طيب واحد زي ده اعمل في امه ايه!!!!
اللي خالاني اهدي شويه ان والدتي كانت معايا.
فين بقي المرور و تطبيقه ولا هو ساعه الفقر متتعوضش (الحظ سابقا).
واحد زي ده ميهونش فيه الحبس و الغرامه .

انا اطالب بدوريات من الظباط و ليس الامناء و العساكر بسيارات مجهزه برادارات تتجول علي الطرق ليل نهار لالزام المواطنين باتباع القانون و الزامهم علي تطبيقه

قانون المرور اللي فارسني

النهارده عايز اوصل صوتي لاي حد من الهم اللي انا فيه و بالتاكيد سببه القانون الجديد للمرور
اولا انا اؤيد تماما القانون الجديد و معه في كل بند من بنوده الاساسيه التي لا خلاف عليها , مع اختلافي علي المثلث العاكس و شنطه الاسعافات.
ثانيا انا ليا و جهه نظر علي موضوع الحوادث الكتيره اللي بتوصل في بعض الاحيان الي 22 الف حادث في 2007 الا وهي ان هذه الحوادث عددها قليل جدا بما هو واقع بالطريق.
يعني كلنا عارفيين طرقنا شكلها ايه مجرد طريق اسفلت ممهد مع بعض الهبوط و الترييح مع الكثير من المطبات و العقبات المفاجئه امامك و يا تلبس فيها ياللي وراك يلبس فيك!
المهم انا اعتقد ان تعريف كلمه طريق سريع ام داخل المدن هو طريق ممهد مع تخطيط طولي لحارات متقطعه متصله بعض الاحيان عند المنحنيات و له خطين جانبيين مع اماكن لتصريف المياه و اناره مع عيون قط علي بدايه كل خط ونهايته بشرط ان تكون الماده المستعمله في التخطيط فسفوريه.
التعريف ده من عندي طبقا لما رأيته بالولايات المتحده الامريكيه اثناء زيارتي ليها.
و اظن انه تعريف بسيط عند خبراء المرور اللي بيقولوا عليهم خبرا
بس انا ليا استفسار هو وزير النقل السيد محمد لطفي منصور مارحش امريكا قبل كده , انا سمعت انه درس فيها يعني اكيد اتأثر بالثقافه المروريه الامريكيه مثلي تماما.
حكايه تأثري دي اكتشفتها في 20-10-2007 لما رجعت من امريكا اول مره و طلعنا علي الطريق الدائري ... بصراحه انا غمضت عيني من اللي انا شايفه بسبب السواقه مع اني كنت بسوق في مصر قبل مسافر و معايا رخصه و كله تمام و حتي انا مسوقتش في مصر الا بعد اسبوعين من رجوعي.
اللي فارسني بقي في موضوع القانون ان الحمد لله لا يوجد في مصر اي طريق او قانون للقياده بمعني ان كل واحد ماشي علي كيفه
سواق الميكروباص اللي ماشي في نص الطريق بالظبط و واخد الحارات ان وجدت في نص العربيه , سواق التريلا ماش علي الشمال و ساعات يجي علي اليمين و يقطع الطريق عشان عايز يلف الناحيه التانيه
المشكله مش في القانون المشكله في الناس اطبعوا علي كده , انه براحته في سرعته و لما هيجي اي كمين او رادار الناس هتحذره.
يعني انا الايام دي كنت بامتحن و علي الطريق كل يوم بين المحله الكبري و طنطا بشوف بلاوي تتدخل الناس كلها السجن خصوصا السير عكس الاتجاه علي طريق سريع من سواقيين النص نقل و بالليل طفي النور من الميكروباص و النص نقل.
و بعدين في ثقافه بينهم مثلا زي النهارده بيرصفوا مقام حاره من الطريق و الطريق مقسم الي حارتين و بعض التراب الذي يصلح للسير عليه جنب الاسفلت ,, فالطريق واقف و ببص ورايا لقيت الحارتين واقف فيهم 4 عربيات نعم طريق حارتين و 4 عربيات فيه واحد في نص الطريق بالظبط و واحد علي يمينه و واحد علي شماله و واحد علي التراب المذكور.
و طبعا الطريق واقف و قعدنا فيها بتاع تلت ساعه .. طيب لو كل واحد ملتزم بحارته يعني العربيات طابور ورا بعضها اظن ان العمليه هتكون اسرع.

دي نقطه في بحر المرور و الطرق في مصر و لنا تكمله ان شاء الله لعدم التطويل علي الساده الزوار

فين احمد عز

هو فين احمد عز ؟؟؟

بقالي كام اسبوع مبشوفش و شه في جرنال الاخبار زي ما احنا متعودين منها صورتين تلاته

و برضه مطلعش علق علي احداث غزه


هل ان الاوان لمحوه من ذاكره الامه و لا ايه اللي حصل بالظبط ؟

اعتراف السيد الرئيس

شاهدت فيديو علي يوتيوب عن حادث محاوله اغتيال السيد الرئيس باثيوبيا و هو عباره عن لقاء له علي الهواء مع الوزراء بقصر القبه


http://www.youtube.com/watch?v=lEXoSYOgs0M&feature=related


و يتحدث عن استمرار المسيره و حتي لو الواحد جري له ايه البلد مش هتقع!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

اعتقد ان ده اعتراف ضمني بعدم حدوث اي شئ من الرئيس في حاله الوفاه او المرض

يعني قضيه ابراهيم عيسي الشهيره بتاع صحه الرئيس ليس لها اي اساس من الصحه

مبارك و الامن

لقيت النهارده صوره في جريده الاخبار فيها ان الرئيس بيمارس حقه الانتخابي و بينتخب ( اكيد مرشح الحزب الوطني ) في الانتخابات بمصر الجديده.
المهم لقيت في الصوره ان المشرفين علي اللجان معلقين كارنيهات علي صدورهم و اكيد الكارنيهات دي بتاع الامن و تحقيق الشخصيه
يعني هي وصلت لغايه كده يعني و لا ايه
يعني مؤتمرات و بيحبسوا الناس قبلها ب 3 ساعات و قلنا ماشي و محدش بيشتكي
و ناس بيقبلهم و عاملين هبل و مش واخدين بالنا
يعني اكن الراجن هيشرب كبايه شاي من ايد و احده فلاحه في غيط و ما احناش عارفين هي حطت اديها فيين و اللجنه اللي هينتخب فيها معلقيين كارنيهات.
و الله لو اخويا الصغير ما يصدق الهبل ده!!!!

الحكم الاجنبي و الاهلي

الي الاخوه الاهلويه اصحاب راي ان الاهلي ما بيكسبش بالحكام و ان ده بمجهود لاعبي الفريقو المدير الفني

احب اقول ان الكلام ده مش مظبوط علي الاطلاق و الدليل هو الحكم الاجنبي!!!!!

نعم حد فيكم لقي قبل كده حكم اجنبي بين (المصري و الاتحاد) او (غزل المحله و بلديه المحله) او( الزمالك و الاسماعيلي)

يلاحظ دائما ان الحكام الاجانب يكونوا فقط في مباريات الاهلي طرف فيها.

يا اما الاسماعيلي بيطلب الحكم او الزمالك

عمرنا ما شوفنا الاهلي بيطلب حكام اجانب ليه؟؟؟

عشان الحكم المصري اهلاوي الطبع و التطبع

بمعني انه ماكنش اهلاوي لازم يمشي مع التيار زي الاعلام بالظبط ودي طبيعه الشعب المصري بيمشي مع القوي حتي يضعف و يشوف واحد تاني !

و بعيد عن الكلام ده

اختيارنا للحكام الاجانب بيعبر عن فشل الاداره و المنظومه باكملها بما فيها مؤسسات الدوله الخدميه و الرياضيه

يعني لما ابقي دوله فيها لجان حكام و حكام دوليين و محاضرين بالاتحاد الدولي و معرفش اعين حكم نزيه لاداره مباره كره قدم بين فريقين

ايا كان الفريقان

يبقي هعرف ادير شؤن الدوله بعيدا عن الوساطه و المحسوبيه

اعتقد انه يوم ما يبقي في حكم مصري لمباراه بين الاهلي و الزمالك اعتقد ان في اللحظه دي حاجات كتير هتتغير

علي فكره انا بشجع غزل المحله

القنوات الرياضيه المصريه

النهارده الجمعه 2-1-2009 كان في ماتش بين الشمس و المصري بكأس مصر.
ماتش واحد بس الساعه الواحده و النصف اي بعد صلاه الجمعه مباشره.
الحكايه عاديه جدا فرقتين بيلعبوا ما بعض


بس اللي مش عادي


ان مفيش ولا قناه رياضيه ذاعت المباره

نعم , انا دورت علي الماتش و بالذات علي مودرن سبورت ملقيتش الماتش!!!!!


هو بورسعيد فيها كام مليون

قول 2 مليون

كام واحد منهم بيشجع المصري

700 الف مثلا

كام واحد هيتفرج علي الماتش

100 الف مثلا

هي دي مش نسبه كويسه اعلانيا و لا ايه

و بعدين هي القنوات دي مش دافعه فلوس عشان تشتري حقوق البث مع الانديه و اتحاد الكوره لاذاعه الدزري و الكاس!!!!!

طيب ليه الماتش ما تذاعش النهارده

مع العلم انه كان الماتش الوحيد بالكاس و مكانش فيه دوري و لا اي حاجه

و بعدين يقولوا الدوري مذاع

نظره ليها لو سمحتم

غزه

قريت علي صفحه مصراوي
ان فتح الحدود مع غزه يؤدي لانتهاك الحكومه الشرعيه بالضفه؟؟؟؟؟؟؟؟؟؟؟؟؟؟؟؟؟؟؟؟؟؟

هو مين اللي انتخب مين

مش برضه الشعب الفلسطيني هو اللي اختار حماس في انتخابات حره نزيهه

و هو اللي رفض اشخاص فتح

و لا احنا عشان متعودين علي التزوير لما حد ينجح بجد يبقي غير شرعي!!!!!!!!!!!!!!!!!!!!

اللهم انصر اهل غزه و انصار غزه و المدافعين عن غزه و حماس ايضا