مركز الكبد بالمحله

هو المركز الوحيد في محافظه الغربيه المتخصص في امراض الكبد فقط .

حيث قُدر عدد المصابين بامراض الكبد المختلفه في محافظه الغربيه 900,000 ( تسعمائه الف مريض )

يذهبون جميعا الي مركز الكبد بشبين الكوم !

يعتبر المركز صرح من صروح الاستشفاء في مصر

وقد تكلف انشائه اكثر من 70,000,000 ( سبعون مليون جنيه )

اذا فهو مركز متطور راقي يستطيع تلبيه احتياجات المرضي بمحافظه الغربيه .

المركز مكيف كليا عن طريق تكييف مركزي و هو امر نادر الحدوث بمستشفيات المحروسه

الكلام حلو اوي بس نيجي للمشكله..............................................................................

المركز انتهت اعمال البناء فيه منذ مايقرب من 7 سنوات كامله .

ايوه 7 سنين

و لسه مادخلوش مريض واحد

اه و الله

المركز لسه ماتفتحش لأداء الخدمه و الغرض منه

ليه.......................؟؟؟؟؟؟؟؟؟؟؟؟؟؟؟؟؟؟؟؟؟

ناس بتقول المبني آيل للسقوط

ناس بتقول التجهيزات مكملتش

ناس بتقول ان في مشكله بين الوزاره و المقاول بسبب الاسعار

طيب و المرضي مالهم باللي بيحصل ده

شوف كام مريض كان ممكن يتعالج في المستشفي دي من يوم ما خلص

شوف كام واحد كان محتاج انه يتعالج في بلد قريبه منه

شوف المنفعه اللي كان يقدر يقدمها للناس

شوف المستوي الفني من الاداء اللي كان يقدر يوصله

انا سمعت ان في مستشفي في الساحل بدأت عمليات زرع كبد و نسبه النجاح وصلت 100 %

كان المركز ده بتجهيزاته يساهم في الزرع ايضا.

ايام الاضراب الاخير في 6 ابريل 2008 وزير الصحه و السكان السيد \ حاتم الجبلي

جه المحله للاطمئنان علي صحه المصابين من جنود الامن المركزي بمستشفي المبره.

اللي يضايق الواحد انك عشان تدخل المحله لازم و لابد و حتما انك تعدي علي مستشفي الكبد و الحميات.

طيب ليه السيد الوزير مسألش عليها و متفقدهاش

و لا هما عملوا انها شغاله لغايه ما الزياره تعدي

الكارثه التانيه ان مستشفي المحله العام تحت التجديد منذ مايقرب من 4 سنوات

عشان كده الوزير راح المبره و ليس العام .

صور لمركز الكبد بالمحله

علي فكره العمود اللي وراه ده للارسال التلفزيوني

الصور واضحه امام حضراتكم المركز جميل و مقفول بالحديد و قدامه زير ميه للناس و الشجر جاهز و المكان واسع و براح مش ناقص بس غير المرضي.

الجمهوريه

اعلنت النهارده في العدد 19898 الصادر في 20 من يونيو 2008 الموافق الجمعه و علي صدر صفحتها الاولي بالبنط الاحمر العريض

اسئله الفيزياء تسربت قبل الامتحان بيومين

يعني امتحان صعب و رزل و رخم و اول مره يجي و كمان امتحات متسرب , الجمهوريه برضه و علي صفحتها الاولي برضه بس تحت شويه جايبه صوره من مذكرات مراجعه احد المدرسين و فيها الاسئله.

مشير و حكيم بطلان جديدان لفيلم تسريب الفيزياء


السيدان مشير و حكيم هما من مدرسي ماده الفيزياء باكبر مراكز الدروس الخصوصيه بمصر الجديده و مدينه نصر
و قاموا بتوزيع اوراق خاصه بالمراجعه يوم الاثنين ليلا ( الامتحان كان ثلاثاء ) كان فيهم مسائل و اسئله كتيره
بس طلبوا من الطلبه التركيز علي عدد معين و محدد منها
الطلبه دخلوا الامتحان و وجدوا الـ 6 اسئله بالنص و كذلك الرسومات
السيد مشير قال اجابات للطلبه بتوعه و السيد حكيم قال اجابات مختلفه لنفس الاسئله للطلبه بتوعه برضه.
و لما الطلبه بدأو يحلوا الاسئله اختلفوا علي الاجابات كل واحد بيقول اللي مدرسه قال عليه و بعد ما زهقوا عملوا حل وسط بأن كتبوا كلا الحلين .

وبعد الامتحان طلعوا يتخانقوا بره المدرسه بصوت عالي و جديه و اصرار علي اثبات ان كل مدرس هو الاصح من الاخر.
الكلام ده من طلبه مدينه نصر و مصر الجديده


نيجي للمهندسين
الجمهوريه بتقول ان الاتصالات انهالت عليها من المهندسين بنفس المشكله و لكن بوقائع جديده
انه تم توزيع اجابات الاسئله و لكن بخط مدرس رفض الطلاب الافصاح عن اسمه خاصه انهم ينتمون الي مدرسه خاصه .

الكلام خلص

مش هوه برضه التعليم ده قضيه امن قومي زي ما الريس و كل المع.... بيقولوا و لا ايه بالظبط

انا اناشد الاب الحنون صاحب الحكمه و البصيره الثاقبه اللي كل رؤساء العالم بيستمعوا الي نصائحه و حكمته ان يتدخل لانقاذ ما تبقي من التعليم.

الصوره دي عجبتني اوي

الصوره لطائره الشحن العسكري الشهيره C 130
بمطار شتوتجارت في يوم 3-8-2004 و هي تقوم بشحن طائره السيد الرئيس.

معلومات عن الطائره :-
SU-BKU Egypt - Air ForceLockheed C-130H-30 Hercules







و هنا بعد ان تم الشحن و هي في طريق العوده لأرض الوطن

عربيات الوزاره

انا مش هتكلم عن عربيات وزاره الاستثمار او الخارجيه و لكن عن الداخليه و كمان مش عربيات الوزير نفسه

لأ عربيات الاداره العامه للمرور



كنت رايح اطلع رخصه دوليه و عايزين بيان ان رخصتي المصريه سليمه ( اضحكوا لو سمحتوا )

المعامله شبه كويسه بس مش دي المشكله



المشكله اني الاقي علي الاقل 10 عربيات عليها بادج الاداره العامه للمرور بشريط اصفر علي عربيات سوداء بالكامل

العربيات دي ايه



( تويوتا كامري )



اه و الله تويوتا كامري من ام 570,000 ( فقط خمسمائه و سبعون الف جنيه )



اكيد في عربيات تانيه انا مشفتهاش بس اللي انا شوفتوا عربيات باجمالي 5 مليون و 700 الف جنيه مصري.



طب ليه ؟



التبذير ده كله مالها الاوكتافيا اللي الامناء اللي مبيعرفوش يقروا و يكتبوا راكبينها و مالها البيجو 307 و مالها حتي لو انت عايز تويوتا تبقي كورولا.

الكامري دي بعد السعر ده علي الاقل 2000 سي سي



يعني بتسحب بنزين بالعبيط و يرجعوا يقولوا مدعمينه و احنا خسرانين فيه كمان .



انا عندي اقتراح حلو اوي ( بعد اذنكوا )



ليه العربيات الكتيره دي متزودش بكمبيوترات و رادارت و تدوها للظباط يسوقوها في الشوارع بدل ما هما قاعدين في الاكمنه يقرفوا الناس.



الظابط من دول يمشي في الشارع هيظبط مخالفات كتير اوي من بتوع الميكروباص و الاتوبيس و التاكسي و الملاكي حتي.

الواحد منهم لو حد قفشوا من قفاه مش هيعمل غلط تاني .

لأن الاكمنه الثابته لو بتجيب 1000 جنيه في اليوم العربيه الواحده ممكن تعمل 5000 يوميا.

و بعدين الاكمنه الثابته كلنا متعودين عليها يعني يهنعدي من حواليها او طريق مختصر او معلش يا جماعه مش هقدر اكمل عشان الظابط اللي في الكمين ده رخم .


ده غير ان الانضباط هيعود للشوارع و مش هيبقي في ميكروباص بيقف يحمل في وسط الطريق و لا اي حاجه من اللي بتحرق الدم دي .
نعمل بأه زي الدول المحترمه زي امريكا و انا سمعت ان السعوديه بتعمل كده ( لو في حد سعودي ممكن يقولي اللي بيحصل لو سمح )
اعتقد ان الطلب ده سهل التطبيق و من شانه القضاء علي المخالفات تدريجيا و يمكن تطبيقه مع تطبيق قانون المرور الجديد....

و اكتملت القصه

بامتحان الفيزياء النهارده.
امتحان زي الزفت في المحله و صراخ و اغماءات بين الطلبه و الاهالي حتي الطلاب البنين كان فيهم حالات هيستيريه
و عياط لغايه ما الشوارع اتغرقت ميه .

وكل ده عشان الطلبه بتقول ان الامتحان في اجزاء كتير مش عارفينها و في مسائل طلبه رياضه 2 هما اللي يحلوها و امتحان طويل و معرفناش نراجع ده غير الـحاجات اللي في النص.

و اللي يغيظ بكره ام الوزاره اللي ربنا قرفنا بيها ( اللهم ما لا اعتراض ) تطلع تقول ان ام الامتحان في مستوي ام الطالب المتوسط و خلو ام الورقه الامتحانيه من الاخطاء و خلوها من الاخطاء المطبعيه و الفنيه . ( مع الاعتذار لجميع الامهات )

انا هستني لبكره و بعدين اكمل

الثانويه الغامه

ايه اللي بيحصل ده في مصر ؟

اول مره من كذا سنه نسمع عن تسرب الامتحانات بالطريقه دي . و الصوره دي .
المنيا و الصعيد هما اللي ظاهرين علي السطح دلوقتي و يمكن مع نهايه الامتحانات تكون ظهرت محافظات جديده اشتركت في عمليه الغش

هو الفساد و صل لغايه امتحانات الثانويه العامه كمان و ليه , يمكن كانت الحاجه الوحيده اللي بنقول انها كانت تتمتع ( بالشفافيه ) و الحياد .
بس الواضح انها كانت خدعه كبيره جدا و الواضح ايضا ان كان و اكيد ان في عمليات غش واسعه المدي سابقا و لكن يمكن الظروف ما كنتش مساعده في الكشف عنها

يعني مثلا في بلد زينا مش معقول ابن اي وزير بيمتحن ثانويه عامه و ميعرفش الامتحان دي تبقي كارثه في حق الوزير
لان في خُدام كتير في خدمه الوزير ممكن يخلصوا المسأله دي ده ان مكنش اللي بيحط الامتحان بيدي درس لابن سعادته شخصيا.
بس الحاله اللي وصلنا ليها نتيجه عوامل كتيره سياسيه و ماديه و اجتماعيه زي الفقر و الطبقيه اللي وصلنا ليها و اختفاء الطبقه المتوسطه , والمال اللي دلوقتي بيعمل كل حاجه و انا سمعت ان اللي بيحص لو انت فقير 500 جنيه و تاخد الامتحان الصبح و لو انت غني 1000 و تاخد الامتحان بالليل .

قانونيا و اعتقد ان ده المفروض يحصل ان الامتحان يتلغي و يعاد من جديد او علي اقل تقدير لو في صعوبه في ده ان الناس تاخد الدرجه النهائيه .
عشان مبدأ تكافؤ الفرص اللي ام الحكومه و الريس مصدعنا بيهم .

حاجه تانيه ليه كل سنه مواعيد امتحانات مختلفه ليه متبقاش ثابته علي مدار السنوات بحيث ان الناس تكون عارف و برضه يكون في وقت معقول للراحه قبل المراجعه .
اللي اقصده ان الكيمياء قبلها يوم واحد فقط بعد امتحان علم النفس ؟
امتي واحد يريح و يراجع برضه الكيمياء بعد امتحان علم النفس ؟؟ ؟؟؟
و اكيد السنه الجايه ممكن الامتحانات تبدأ بالكيمياء

انا اعتقد ان الناس محتاجه وقفه ضد وزاره التعليم و الحكومه عشان البلد تتظبط .

شفتوا الانسانيه و الابويه

بتاع الريس ربنا يطولنا في عمره و يديلوه علي اد نيته , قرر زياده وقت الامتحان لطلبه محافظه 6 اكتوبر في امتحان التفاضل لتانيه ثانوي .

الخبر ده جه امبارح علي شريط الاخبار علي القناه الفضائيه المصريه !!!!!!!!!

طبعا خبر زي ده لازم برضه يجي في الجرايد و فعلا الاخبار افردت له مساحه

امبارح مكنتش عارف السبب , قلت يمكن مراقبين عاملوا حادثه او الطلبه . بس لما عرفت اتجننت



السبب ان الريس كان في زياره ل 6 اكتوبر يعني البلد متقفله بالضبه و المفتاح و في الاخر طبعا هيقولوا ابويه الرئيس
طيب هو الريس مش عارف ان اي مكان بيروحه بيتقفل تماما و يتم منع المرور فيه او مجرد التواجد ؟
ده لو ميعرفش كده تبقي كارثه !!!!!!!!!!!!!!!!!!!!!!!
ده يوم ما جه المحله اخر مره في 2005 ايام الانتخابات البلد بتضنضف يوميا و بتترش ميه و بتسفل و كما منعوا القطر اللي جاي من طنطا و المنصوره الدخول للمحله.
الريس الطياره الهيليكوبتر بتاعه هتنزل في استاد غزل المحله و بعدين الموكب بتاعه بيمشي داخل الشركه و بعض المساكن الخاصه بكبار المسئولين و طبعا التعليمات كانت ممنوع حد يفتح الشباك او البلكونه و كان في اعلي كل عماره افراد حراسه مسلحين و موجهين اسلحتهم للشبابيك و البلكونات.
و اجتماع الحزب اللي هو هيحضره الناس قاعده جوه من الساعه 7 صباحا و مقفول عليهم و ممنوع الدخول و الخروج لحد ما الريس جه الساعه 11 و مشي و هم بدأو يمشوا .
اي ديموقراطيه هذه ؟؟
طيب ليه كل ده لو كان هو مفكر نفسه عادل و وطني و مهتم .

اعرف واحد صديق لجدي كان شغال في الشركه زمان كان بيحكيلي انه كان لمس كتف الملك فاروق و هو في زيارته للشركه.

و الريس عبدالناصر و كل خصومه من مجلس الثوره او الاخوان كان بيمشي في الشارع بعربيه مكشوفه و لما كان في القطر بيسلم علي المتواجدين في المحطات.

ليه ده بأه بيحصل ......... السؤال هل ده بامر من الرئيس ام ان جهاز حمايته مزودها حبتين ؟؟؟؟؟

و المفروض لو في شفافيه

المفروض يعلنوا عن مخصصات الرئاسه و مصاريفها زي ما بقيت الدول بتعمل .

انتو السبب

الشعب المصري دائما هو السبب في كل المشاكل العصريه المعاصره المصريه .
زي ما هو السبب في ازمات رغيف العيش و المواصلات و البان الاطفال الرضع و الحر . طبعا لازم يكون السبب في تعطيل التنميه و التقدم و الديموقراطيه عشان الشعب لسه مش فاهم يعني ايه ديموقراطيه و لازم يدخل الحضانه الاول.
اللي خلاني اتكلم بسبب دعوه الرئيس المستفزه هو و موالسيه من اخبار و اهرام و جمهوريه و احد علماء الازهر و وزير الصحه انه بيقول ان احنا مش عارفين نتقدم عشان عددنا كبير و 80 مليون كتير اوي و ازاي نصرف عليكم و نجيب منين فلوس .
يعني الواضح من الكلام ان احنا نموت الشعب و نخَلص عليه عشان نعرف نعيش كويس زي ما جه في الاخبار ( الجريده ) امبارح ان احنا بنصرف مش عارف كام مليار علي الصحه و كام مليار علي التعليم و النقل و المواصلات
و الدعوه اللي في الجرنان ان عددنا الكبير بيعوق التنميه و لازم نقلل عددنا عشان الفلوس تكفي .
بصراحه معاهم حق بس مش بالطريقه دي .
لأن الشعب مش مسئول عن انخفاض قيمه الجنيه و مش مسئول عن ارتفاع سعر الفول و الطعميه و مش مسئول عن ارتفاع الطماطم و البنزين و السكر و العدس اللي هو ب 9 جنيه دلوقتي.
كان الاولي بدل ما احنا عامليين نصوت من الزياده كنا انشئنا عاصمه جديده علي الاقل كانت هتحل ازمه المواصلات و السكان في القاهره .
نروح نزرع الصحرا بجد بدل ما احنا مدينها للشركات الكبيره.
كنا نزود الدخول بمعدل ثابت مثلا من 25 سنه مش نزودها مره واحده .
و بالمناسبه والدتي علاوتها ال 30 % اللي عاملين عليها قلق و انجاز 70 جنيه مصري فقط لا غير .
مساحه مصر تعتبر مليون كيلو متر مربع و عدد السكان 80 مليون يعني لو قسمنا يكون في كل كيلو مربع 80 فرد
وحيث ان 98% من السكان يقيمون علي 4% من المساحه لازم يكون في ازمه.
يعني لو عملنا فروع عرضيه من النيل و عملنا نهر نيل جديد في الصحراء الغربيه , اعتقد انه هيبقي احسن من مشروع توشكي.
و انا صغير كنت دايما اقرأ علي الطريق السريع عباره لابد ان تترك مسافه 50 متر من حرم الطريق للبناء.
دلوقتي البيوت ومداخله لازقه في الطريق و كل يوم حوادث بالهبل.
اعتقد ان التخطيط السليم للصحراء هو الحل الامثل للتنميه و التقدم و الرخاء