الأربعاء، 24 مارس 2010

احنا المصريين

ايوه احنا المصريين
بنعمل اللي احنا عايزينه و بمزاجنا و لو مش عجبنا عادي نرجع فيه , بس مش في اوقات كتير و بالذات لما تكون قرارات من السيد رئيس الجمهوريه اللي اكيد مبيغلطش ابدا.
ايوه احنا المصريين اللي استوردنا التوك توك بالهبل و بعد ما شغلنا عليه قال ايه الشباب اللي مش لاقي شغل نرجع في كلامنا و نمنعه و يبقي القرار في ايد المحافظ او مدير المرور او اي عامل بوفيه في دوار العمده.
ايوه احنا المصريين اللي استوردنا التليفونات الصيني و دخلناها السوق و عملنا حركه في السوق و انتعاش و لما السبوبه خلصت ايه ده التليفونات دي دخلت ازاي و هي سيريال نمبر واحد ,,,,, يا مصبتي ,,,, يا دهوتي ,,,, وزير الداخليه جري يعيط و يضرب دماغه في الحيط
ازاي هجيب الناس اللي بتعمل مصايب و عايزين يقلبوا نظام الحكم يعني لو بيتكلموا من موبايل صيني برقم 32455 ايه ده انا هقبض علي 254354 واحد معاه التليفون ده و هنعذب كل دول ازاي.
ايوه احنا المصريين اللي رحنا استوردنا لحمه من السودان و من اثيوبيا عشان معندناش لحمه.
ايوه احنا المصريين اللي مش عارفين ننظم المروم في القاهره و لا في اي مصيبه فيكي يا مصر, اكن الموضوع ده محتاج خيال علمي و شعوذه
طب ما نجيب خبرات من بره لا لالا لا لا لا دي سياده و عشان مننشرش غسيلنا بره.
ايوه احنا المصريين اللي مش عارفين نوصل كاس عالم حتي لو كنا في اسهل المجموعات بس نقول ايه قضاء و قدر
ايوه احنا المصريين اللي بنافق الرئيس و الشعب مع بعض حاجه حلوه اوي طياره الرئيس طلعت عمله طلعه جويه تدريبيه قبل سيادته ما يرجع بسلامته تقريبا كانو بيغيرولها زيت و بيلمعو التابلوه و بينفخو العجل.
ايوه احنا المصريين اللي هنفض طول عمرنا بندور علي رغيف العيش.
ايوه احنا المصريين اللي بنستغل الشعب في كل حاجه تذاكر ماتش الجزائر انابيب بوتجاز رغيف عيش
ايوه احنا المصريين اللي عندنا حضاره 7000 سنه اللهم ما بارك يا رب


ايوه احنا المصريين اللي كل حاجه عندنا تمام و زي الفل.