ليه

ليه بحس ان اعلانات العراق علي قنوات روتانا انها تنطبق تماما علي الشعب المصري؟
صحيح كل الاعلانات اللي بتقول مواعظ للشعب العراقي عن الحب و الاخاء و التسامح و كل المثل الفضيله اللي المفروض اتربينا عليها كمصريين مبنطبقهاش .
يعني في الشارع تلاقي اللي بيسب الدين و الام و الاب و اللي يقول جامده ...
و الحاجه اللي لفتت نظري ان مفيش واحده ماشيه في حالها في الشارع الا و لازم واحد يعاكسها سواء باللفظ او تطورا باللمس
تلاقي و احنا سايقيين عربيات الناس اللي في الشارع بتشتم فيك و انت بتشتم فيهم .
الناس بتتخانق عشان العيش و الميه و اللي يعدي بعربيته الاول
ليه اخلاقنا كمصريين انحدرت اوي كده ؟
هل عشان كترنا و بقينا 80 مليون و الوحش كتر و لا ايه بالظبط

سؤال محيرني

ليه احنا ( يمكن الشعب الوحيد ) لما نيجي نعدي الشارع نبص يمين و شمال ؟؟؟؟

صحيح و الله ليه لما اعدي شارع سواء في المحله او طنطا او المنصوره او القاهره لازم ابص علي شمالي و بعدين علي يميني و بعدين اعدي الطريق .


المفروض ابص علي حسب الاتجاه اللي هعديه
مش كده و لا ايه

يعني العربيات جايه من علي شمالي ابص شمالي و اتاكد ان مفيش حاجه جايه و بعدين اعدي .

لكن اعتقد فعلا ان مفيش حد واخد باله من الحكايه دي

يعني علي سبيل المثال في المحله

مفيش واحد ماشي صح في البلد دي

عكس اتجاه و عربيات داخله في بعض و كله مربي و عسل

و التوك توك ده لوحده حكايه ..................... ده بيقفل مزلقان القطار اللي علي الشون مستني زباين و العسكري واقف و الظباط علي بعد 50 متر منه ,,, و ليه كلام تاني

نرجع تاني

في امريكا مثلا

مفيش واحد ممكن يفكر اه يفكر

انه يعدي شارع مخالف او يخطف الحته دي مخالف عشان اسرع و لا حاجه
هتبقي ليله امه سوده و لو حد مسكه ممكن ميسوقش مدي الحياه

انما هنا في مصر كل شئ متاح حتي مع قانون المرور الجديد

و الله يكون في عونا

أحداث اليونان

انا عندي استفسار بسيط

ليه الاخبار في مصر جابت مواضيع مفصله عن اضراب اليونان و كل ما شهده من تخريب و اعمال عنف من جانب المتظاهرين و الشرطه.

لدرجه ان جريده الاخبار نشرت من كام يوم صوره في الصفحه الاولي لوسط اثينا اثناء الاضراب و التخريب.

في الوقت نفسه ان الصحيفه لم تذكر اي تعليق او صور عن اضراب المحله في 6 ابريل الماضي.

كذلك ايضا عند حدوث اي اضراب في العالم و بالاخص فرنسا نجد جميع القنوات الارضيه و الفضائيه المصريه تعرض صورا للاضرابات .

ليه التفرقه دي

و لا احنا عشان قله منحرفه و شويه عيال صغيره مبنعرفش حاجه نبقي منكبرش الموضوع و نقفل عليه.

و لا عشان منعكرش صفو مزاج الحاكم.

سؤال منطقي

انقذوا المحله الكبري

هو فعلا نداء الي كل مسؤل عن هذا الشعب اما الله عز و جل

فالبلد التي ولدت فيها و مازلت اعيش بها حتي الان قد انهارت

نعم, انهارت بكل ما تحمله الكلمه من معاني

يقال عنها مدينه المحله الكبري قلعه صناعه النسيج بالشرق الاوسط اجمع

و يالها من نكته بلهاء

فقد ضرب السوس المدينه من اسفلها الي اعلاها من شرقها الي جنوبها , شمالا و جنوبا

لقد انهارت و استغاثت و لم يسعفها احد

لقد و صل الفساد بالمحله الكبري لدرجه لا يتخيلها بشر

لدرجه ان امام مبني حي ثان المحله الكبري الذي اتبعه كميه فساد تكفي دوله باكملها و ليس بلد فرئيس الحي ( الحقيقه لا اعرفه )

لو بيمشي بجوار الحي لما وصل الفساد لهذه الدرجه

فالشوارع مكسره و المواصلات و الطرق عشوائيه فالكل يمر امام مبني الحي مخالف انتظار عشوائي بالمره

و اخيرا مياه المجاري تضرب بمدرسه طلعت حرب الابتدائيه بالشارع المقابل للمجلس المحلي الشعبي و بالمناسبه مجاور للحي

ممكن البعض من المسؤلين يتكلموا عن الشوارع بحجه ان احنا بندخل خدمات للبلد زي الغاز و انا سمعتها من احد الاشاوس بالمجلس المحلي الذين نجحوا بالتزكيه.

امام منزلي الذي لا يبعد عن مبني الحي باكثر من 300 متر و بالمناسبه هو شارع يقع باخره نادي لضباط الشرطه يعني كل يوم ناس مهمه بتروح و تيجي من مدراء امن و محافظين

المهم امام بيتي الذي يقع باول الشارع و امام بوابه تابعه لمساكن عمال شركه مصر للغزل و النسيج

من ثلاث سنوات ماسوره مياه عملاقه ضربت بالشارع ليله عيد نعم وقفه عيد , الصراحه لا اتذكر اضحي ام فطر و لكنه كان بعام 2005

المهم الماسوره ضربت و الشارع غرق .

نكلم بقي الحي ليه .......

لان المساكن التابعه لغزل المحله من اكبر ساحات صلاه العيد بالمحله

يعني الناس مش هتعرف تصلي بعد اقل من 12 ساعه

كلمنا الحي و محدش اتحرك الا لما كلمنا احد ظباط المحله فالدنيا اتحركت و بحمد الله تم تصليح الماسوره بخابور خشب

و ردمه عليها و جابوا مقاطير رمل و الحياه مشيت الحمد لله و الناس صلت.

طيب ايه اللي يخليني اتكلم في الموضوع ده!!!!!!!!

الكلام كان في 2005 و احنا في 2008

الحفره اتردمت بالشكل اللي في الصوره دي

عملا بالظبط زي مطبات صغيره و حفر في شكل بيضاوي

طبعا واكله من الشارع مقام حاره ( هو في مرور و لا حارات اصلا )

مش مشكله بس المشكله انه من اسبوعين تلاته فجأه العمال تنظف الشارع و تكنسه كما بالصوره عشان المحافظ جاي

لما كان احمد شوبير و حسن صقر و المحافظ في زياره لنادي بلديه المحله كانوا بينضفوا الشارع علي اساس انهم ممكن يروحوا لنادي الصيد الذي يقع بجوار نادي الشرطه باخر الشارع

المهم محدش عدي في اليوم ده

بس طبعا من الاحتياط ان احنا نظبط الشارع و يبقي زي الفل قدام عين المحافظ و الساده المسؤلين

فالصبح جت البلديه و عمال النظافه و قاموا بتسويه الحفره كما موضح بالصوره بالظبط

و انتهوا من تسويتها بالصوره ادناه

و جت عربيه الاسفلت في انتظار ترقيع الحفره

و لكن لا حياه لمن تنادي

و يا فرحه ما تمت

العربيه مشت و و الحفره لم بتم تسفيلها

و الصوره اعلاه لسه ملتقطها حالا اليوم 11-12-2008

و الصور الباقيه يوم 17-11-2008

ده مثال بسيط جدا للحاله التي وصلت لها المحله الكبري رائده صناعه الغزل و النسيج بالشرق الاوسط

ملحوظه اخيره :-

يظهر بالصوره الرابعه بقايا طين هي من اثار انفجار الماسوره مره اخري حوالي يوم 10-11-2008

و لكن بحمد الله تكفلت الطبيعه بالمياه و نشفت قبل ما المحافظ يجي

هادي فهمي

انا سمعت من كام يوم ان المشمهندس هادي فهمي ( اخو المشمهندس سامح فهمي وزير البترول ) مستشار وزير الاستثمار بعد ان كان رئيس الشركه القابضه للتجاره , انه قدم اوراق ترشيحه لانتخابات الاتحاد المصري لكره اليد المزمع اجراؤها هذا الشهر.

فبعد ان خسر انتخابات اتحاد كره القدم اصبح له عده مقالات في بعض الصحف اليوميه و اصبح يتحدث عن الكره في مصر من منطق خبير باللعبه

انا سؤالي ايه علاقه اتحاد اليد باتحاد كره القدم

و لا هو كله كور

ايه علاقه مستشار وزير الاستثمار و رئيس شركه قابضه سابقا بالرياضه

هو انا مانجحتش في القدم ممكن انزل في اليد و بعدين ممكن التنس

و  لا هو كله في مصلحه الوطن و العمل التطوعي

المشكله انه نازل الانتخابات امام رئيس الاتحاد الدولي و المصري لكره اليد الدكتور حسن مصطفي 

يعني راجل في اللعبه من يوم ما انا تابعت رياضه و يد

طيب ليه بيعمل كده

و اللي يغيظ اكتر الصحف بتنشر احاديث و حوارات معاه و كانه هيخلص كل المشاكل اللي في الاتحاد.

بصراحه انا معنديش مشاكل في شخص المهندس بس

مش كل حاجه انا ليه فيها يعني 

و بعدين مش هخدم الاتحاد زي حسن مصطفي

سؤال يحتاج الي تفسير

اهلا

ارحب مجددا بزواري الاعزاء

فبعد رحله سفر استغرقت 5 اشهر اعود للكتابه من جديد علي صفحتي المحببه

و ارجو ان تتقبلوا اعتذاري عن انقطاعي

و شكرا

عملتنا المصريه

اعتقد ان العمله المصريه تعتبر من اسوأ العملات الموجوده حاليا علي جميع المستويات
مش بس بالشكل و لكن بالقيمه و الخامه و كل حاجه تانيه تخطر علي بال سعادتكم.
و المشكله كمان ان البنوك و الشعب مش معترفين بيها
يعني لو معاك حته بميت جنيه و متبهدله شويه و مش مزوره و حبيت تصرفها محدش هياخدها منك عشان مبتروحش يا استاذ.
ده كمان لو انت راكب ميكروباص من ابو ريع او نص و مش عاجيه اللي سايق و لا التباع هيهزق حضرتك و هيبهدللك عشان الورقه دي
الكارثه ان دلوقتي لو معاك فلوس و عايز تغيرها البنوك مبترضاش تغيرها و لازم يكون معاك واسطه و تعرف المدير عشان يغيرها


انا قرأت في المصري اليوم ان و احد اخذ 100 جنيه من البنك و مزوره و البنك مش عايز يرجعها او يغيره
الكارثه ان البنك هو البنك الاهلي اللي هو مسئول عن الطبع و خلافه
يعني المسئول الاول عنها
طيب لما البنك يعمل كده الناس تعمل ايه

المشكله ان الوعي عند الناس قليل و ناس كتير مبتعرفش تاخد حقها بتقللك ابعد عن الشر و غنيله
لما يحصله حاجه

رغيف العيش

انا ليا تعليق بسيط علي موضوع بيحصل كل يوم وهو

القبض علي صاحب مطعم يقوم بشحن عدد من الارغفه الي مطعمه
يعني يمكن يكون من 100 الي ما فوق

طيب ما كل مطاعم الفول و الطعميه في المحروسه بتعمل سندوتشات يا بلدي يا ابيض ( فينوو )
و اكيد السيد الوزير راعي رغيف العيش بياكل من عند عربيه عم احمد بتاع الفول .
و اكيد برضه بياخد عيش بلدي مخصوص للسيد الوزير

زيت حار جوه عشان الرئيس لو طلبه يروح و هو ريحته زيت حار
ده ميعديش من بوابات الامن في القصر الجمهوري

طيب شوف كام مليون عامل يوميه في مصر من سباكين و ميكانيكيه و كهربائيه و نقاشين و مبيضين محاره و حدادين و نجارين و كل الحرف الاخري.
مش دول برضه من اكله الفول المصري بالزيت الحار و العادي
طيب لما ياخد سندوتش الفول بالعيش البلدي المدعم اللي فيه كل انواع الحديد و الفيتامينات
ده مش هيفيده في شغله و يعوضله نقص اللحوم اللي مبيكلهاش

اذا العيش المدعم بيوصله بطريقه غير مباشره .

انا شايف انه مفيش مشكله ان ده بحصل


يصراحه دي وجهه نظري .

مركز الكبد بالمحله

هو المركز الوحيد في محافظه الغربيه المتخصص في امراض الكبد فقط .

حيث قُدر عدد المصابين بامراض الكبد المختلفه في محافظه الغربيه 900,000 ( تسعمائه الف مريض )

يذهبون جميعا الي مركز الكبد بشبين الكوم !

يعتبر المركز صرح من صروح الاستشفاء في مصر

وقد تكلف انشائه اكثر من 70,000,000 ( سبعون مليون جنيه )

اذا فهو مركز متطور راقي يستطيع تلبيه احتياجات المرضي بمحافظه الغربيه .

المركز مكيف كليا عن طريق تكييف مركزي و هو امر نادر الحدوث بمستشفيات المحروسه

الكلام حلو اوي بس نيجي للمشكله..............................................................................

المركز انتهت اعمال البناء فيه منذ مايقرب من 7 سنوات كامله .

ايوه 7 سنين

و لسه مادخلوش مريض واحد

اه و الله

المركز لسه ماتفتحش لأداء الخدمه و الغرض منه

ليه.......................؟؟؟؟؟؟؟؟؟؟؟؟؟؟؟؟؟؟؟؟؟

ناس بتقول المبني آيل للسقوط

ناس بتقول التجهيزات مكملتش

ناس بتقول ان في مشكله بين الوزاره و المقاول بسبب الاسعار

طيب و المرضي مالهم باللي بيحصل ده

شوف كام مريض كان ممكن يتعالج في المستشفي دي من يوم ما خلص

شوف كام واحد كان محتاج انه يتعالج في بلد قريبه منه

شوف المنفعه اللي كان يقدر يقدمها للناس

شوف المستوي الفني من الاداء اللي كان يقدر يوصله

انا سمعت ان في مستشفي في الساحل بدأت عمليات زرع كبد و نسبه النجاح وصلت 100 %

كان المركز ده بتجهيزاته يساهم في الزرع ايضا.

ايام الاضراب الاخير في 6 ابريل 2008 وزير الصحه و السكان السيد \ حاتم الجبلي

جه المحله للاطمئنان علي صحه المصابين من جنود الامن المركزي بمستشفي المبره.

اللي يضايق الواحد انك عشان تدخل المحله لازم و لابد و حتما انك تعدي علي مستشفي الكبد و الحميات.

طيب ليه السيد الوزير مسألش عليها و متفقدهاش

و لا هما عملوا انها شغاله لغايه ما الزياره تعدي

الكارثه التانيه ان مستشفي المحله العام تحت التجديد منذ مايقرب من 4 سنوات

عشان كده الوزير راح المبره و ليس العام .

صور لمركز الكبد بالمحله

علي فكره العمود اللي وراه ده للارسال التلفزيوني

الصور واضحه امام حضراتكم المركز جميل و مقفول بالحديد و قدامه زير ميه للناس و الشجر جاهز و المكان واسع و براح مش ناقص بس غير المرضي.

الجمهوريه

اعلنت النهارده في العدد 19898 الصادر في 20 من يونيو 2008 الموافق الجمعه و علي صدر صفحتها الاولي بالبنط الاحمر العريض

اسئله الفيزياء تسربت قبل الامتحان بيومين

يعني امتحان صعب و رزل و رخم و اول مره يجي و كمان امتحات متسرب , الجمهوريه برضه و علي صفحتها الاولي برضه بس تحت شويه جايبه صوره من مذكرات مراجعه احد المدرسين و فيها الاسئله.

مشير و حكيم بطلان جديدان لفيلم تسريب الفيزياء


السيدان مشير و حكيم هما من مدرسي ماده الفيزياء باكبر مراكز الدروس الخصوصيه بمصر الجديده و مدينه نصر
و قاموا بتوزيع اوراق خاصه بالمراجعه يوم الاثنين ليلا ( الامتحان كان ثلاثاء ) كان فيهم مسائل و اسئله كتيره
بس طلبوا من الطلبه التركيز علي عدد معين و محدد منها
الطلبه دخلوا الامتحان و وجدوا الـ 6 اسئله بالنص و كذلك الرسومات
السيد مشير قال اجابات للطلبه بتوعه و السيد حكيم قال اجابات مختلفه لنفس الاسئله للطلبه بتوعه برضه.
و لما الطلبه بدأو يحلوا الاسئله اختلفوا علي الاجابات كل واحد بيقول اللي مدرسه قال عليه و بعد ما زهقوا عملوا حل وسط بأن كتبوا كلا الحلين .

وبعد الامتحان طلعوا يتخانقوا بره المدرسه بصوت عالي و جديه و اصرار علي اثبات ان كل مدرس هو الاصح من الاخر.
الكلام ده من طلبه مدينه نصر و مصر الجديده


نيجي للمهندسين
الجمهوريه بتقول ان الاتصالات انهالت عليها من المهندسين بنفس المشكله و لكن بوقائع جديده
انه تم توزيع اجابات الاسئله و لكن بخط مدرس رفض الطلاب الافصاح عن اسمه خاصه انهم ينتمون الي مدرسه خاصه .

الكلام خلص

مش هوه برضه التعليم ده قضيه امن قومي زي ما الريس و كل المع.... بيقولوا و لا ايه بالظبط

انا اناشد الاب الحنون صاحب الحكمه و البصيره الثاقبه اللي كل رؤساء العالم بيستمعوا الي نصائحه و حكمته ان يتدخل لانقاذ ما تبقي من التعليم.

الصوره دي عجبتني اوي

الصوره لطائره الشحن العسكري الشهيره C 130
بمطار شتوتجارت في يوم 3-8-2004 و هي تقوم بشحن طائره السيد الرئيس.

معلومات عن الطائره :-
SU-BKU Egypt - Air ForceLockheed C-130H-30 Hercules







و هنا بعد ان تم الشحن و هي في طريق العوده لأرض الوطن

عربيات الوزاره

انا مش هتكلم عن عربيات وزاره الاستثمار او الخارجيه و لكن عن الداخليه و كمان مش عربيات الوزير نفسه

لأ عربيات الاداره العامه للمرور



كنت رايح اطلع رخصه دوليه و عايزين بيان ان رخصتي المصريه سليمه ( اضحكوا لو سمحتوا )

المعامله شبه كويسه بس مش دي المشكله



المشكله اني الاقي علي الاقل 10 عربيات عليها بادج الاداره العامه للمرور بشريط اصفر علي عربيات سوداء بالكامل

العربيات دي ايه



( تويوتا كامري )



اه و الله تويوتا كامري من ام 570,000 ( فقط خمسمائه و سبعون الف جنيه )



اكيد في عربيات تانيه انا مشفتهاش بس اللي انا شوفتوا عربيات باجمالي 5 مليون و 700 الف جنيه مصري.



طب ليه ؟



التبذير ده كله مالها الاوكتافيا اللي الامناء اللي مبيعرفوش يقروا و يكتبوا راكبينها و مالها البيجو 307 و مالها حتي لو انت عايز تويوتا تبقي كورولا.

الكامري دي بعد السعر ده علي الاقل 2000 سي سي



يعني بتسحب بنزين بالعبيط و يرجعوا يقولوا مدعمينه و احنا خسرانين فيه كمان .



انا عندي اقتراح حلو اوي ( بعد اذنكوا )



ليه العربيات الكتيره دي متزودش بكمبيوترات و رادارت و تدوها للظباط يسوقوها في الشوارع بدل ما هما قاعدين في الاكمنه يقرفوا الناس.



الظابط من دول يمشي في الشارع هيظبط مخالفات كتير اوي من بتوع الميكروباص و الاتوبيس و التاكسي و الملاكي حتي.

الواحد منهم لو حد قفشوا من قفاه مش هيعمل غلط تاني .

لأن الاكمنه الثابته لو بتجيب 1000 جنيه في اليوم العربيه الواحده ممكن تعمل 5000 يوميا.

و بعدين الاكمنه الثابته كلنا متعودين عليها يعني يهنعدي من حواليها او طريق مختصر او معلش يا جماعه مش هقدر اكمل عشان الظابط اللي في الكمين ده رخم .


ده غير ان الانضباط هيعود للشوارع و مش هيبقي في ميكروباص بيقف يحمل في وسط الطريق و لا اي حاجه من اللي بتحرق الدم دي .
نعمل بأه زي الدول المحترمه زي امريكا و انا سمعت ان السعوديه بتعمل كده ( لو في حد سعودي ممكن يقولي اللي بيحصل لو سمح )
اعتقد ان الطلب ده سهل التطبيق و من شانه القضاء علي المخالفات تدريجيا و يمكن تطبيقه مع تطبيق قانون المرور الجديد....

و اكتملت القصه

بامتحان الفيزياء النهارده.
امتحان زي الزفت في المحله و صراخ و اغماءات بين الطلبه و الاهالي حتي الطلاب البنين كان فيهم حالات هيستيريه
و عياط لغايه ما الشوارع اتغرقت ميه .

وكل ده عشان الطلبه بتقول ان الامتحان في اجزاء كتير مش عارفينها و في مسائل طلبه رياضه 2 هما اللي يحلوها و امتحان طويل و معرفناش نراجع ده غير الـحاجات اللي في النص.

و اللي يغيظ بكره ام الوزاره اللي ربنا قرفنا بيها ( اللهم ما لا اعتراض ) تطلع تقول ان ام الامتحان في مستوي ام الطالب المتوسط و خلو ام الورقه الامتحانيه من الاخطاء و خلوها من الاخطاء المطبعيه و الفنيه . ( مع الاعتذار لجميع الامهات )

انا هستني لبكره و بعدين اكمل

الثانويه الغامه

ايه اللي بيحصل ده في مصر ؟

اول مره من كذا سنه نسمع عن تسرب الامتحانات بالطريقه دي . و الصوره دي .
المنيا و الصعيد هما اللي ظاهرين علي السطح دلوقتي و يمكن مع نهايه الامتحانات تكون ظهرت محافظات جديده اشتركت في عمليه الغش

هو الفساد و صل لغايه امتحانات الثانويه العامه كمان و ليه , يمكن كانت الحاجه الوحيده اللي بنقول انها كانت تتمتع ( بالشفافيه ) و الحياد .
بس الواضح انها كانت خدعه كبيره جدا و الواضح ايضا ان كان و اكيد ان في عمليات غش واسعه المدي سابقا و لكن يمكن الظروف ما كنتش مساعده في الكشف عنها

يعني مثلا في بلد زينا مش معقول ابن اي وزير بيمتحن ثانويه عامه و ميعرفش الامتحان دي تبقي كارثه في حق الوزير
لان في خُدام كتير في خدمه الوزير ممكن يخلصوا المسأله دي ده ان مكنش اللي بيحط الامتحان بيدي درس لابن سعادته شخصيا.
بس الحاله اللي وصلنا ليها نتيجه عوامل كتيره سياسيه و ماديه و اجتماعيه زي الفقر و الطبقيه اللي وصلنا ليها و اختفاء الطبقه المتوسطه , والمال اللي دلوقتي بيعمل كل حاجه و انا سمعت ان اللي بيحص لو انت فقير 500 جنيه و تاخد الامتحان الصبح و لو انت غني 1000 و تاخد الامتحان بالليل .

قانونيا و اعتقد ان ده المفروض يحصل ان الامتحان يتلغي و يعاد من جديد او علي اقل تقدير لو في صعوبه في ده ان الناس تاخد الدرجه النهائيه .
عشان مبدأ تكافؤ الفرص اللي ام الحكومه و الريس مصدعنا بيهم .

حاجه تانيه ليه كل سنه مواعيد امتحانات مختلفه ليه متبقاش ثابته علي مدار السنوات بحيث ان الناس تكون عارف و برضه يكون في وقت معقول للراحه قبل المراجعه .
اللي اقصده ان الكيمياء قبلها يوم واحد فقط بعد امتحان علم النفس ؟
امتي واحد يريح و يراجع برضه الكيمياء بعد امتحان علم النفس ؟؟ ؟؟؟
و اكيد السنه الجايه ممكن الامتحانات تبدأ بالكيمياء

انا اعتقد ان الناس محتاجه وقفه ضد وزاره التعليم و الحكومه عشان البلد تتظبط .

شفتوا الانسانيه و الابويه

بتاع الريس ربنا يطولنا في عمره و يديلوه علي اد نيته , قرر زياده وقت الامتحان لطلبه محافظه 6 اكتوبر في امتحان التفاضل لتانيه ثانوي .

الخبر ده جه امبارح علي شريط الاخبار علي القناه الفضائيه المصريه !!!!!!!!!

طبعا خبر زي ده لازم برضه يجي في الجرايد و فعلا الاخبار افردت له مساحه

امبارح مكنتش عارف السبب , قلت يمكن مراقبين عاملوا حادثه او الطلبه . بس لما عرفت اتجننت



السبب ان الريس كان في زياره ل 6 اكتوبر يعني البلد متقفله بالضبه و المفتاح و في الاخر طبعا هيقولوا ابويه الرئيس
طيب هو الريس مش عارف ان اي مكان بيروحه بيتقفل تماما و يتم منع المرور فيه او مجرد التواجد ؟
ده لو ميعرفش كده تبقي كارثه !!!!!!!!!!!!!!!!!!!!!!!
ده يوم ما جه المحله اخر مره في 2005 ايام الانتخابات البلد بتضنضف يوميا و بتترش ميه و بتسفل و كما منعوا القطر اللي جاي من طنطا و المنصوره الدخول للمحله.
الريس الطياره الهيليكوبتر بتاعه هتنزل في استاد غزل المحله و بعدين الموكب بتاعه بيمشي داخل الشركه و بعض المساكن الخاصه بكبار المسئولين و طبعا التعليمات كانت ممنوع حد يفتح الشباك او البلكونه و كان في اعلي كل عماره افراد حراسه مسلحين و موجهين اسلحتهم للشبابيك و البلكونات.
و اجتماع الحزب اللي هو هيحضره الناس قاعده جوه من الساعه 7 صباحا و مقفول عليهم و ممنوع الدخول و الخروج لحد ما الريس جه الساعه 11 و مشي و هم بدأو يمشوا .
اي ديموقراطيه هذه ؟؟
طيب ليه كل ده لو كان هو مفكر نفسه عادل و وطني و مهتم .

اعرف واحد صديق لجدي كان شغال في الشركه زمان كان بيحكيلي انه كان لمس كتف الملك فاروق و هو في زيارته للشركه.

و الريس عبدالناصر و كل خصومه من مجلس الثوره او الاخوان كان بيمشي في الشارع بعربيه مكشوفه و لما كان في القطر بيسلم علي المتواجدين في المحطات.

ليه ده بأه بيحصل ......... السؤال هل ده بامر من الرئيس ام ان جهاز حمايته مزودها حبتين ؟؟؟؟؟

و المفروض لو في شفافيه

المفروض يعلنوا عن مخصصات الرئاسه و مصاريفها زي ما بقيت الدول بتعمل .

انتو السبب

الشعب المصري دائما هو السبب في كل المشاكل العصريه المعاصره المصريه .
زي ما هو السبب في ازمات رغيف العيش و المواصلات و البان الاطفال الرضع و الحر . طبعا لازم يكون السبب في تعطيل التنميه و التقدم و الديموقراطيه عشان الشعب لسه مش فاهم يعني ايه ديموقراطيه و لازم يدخل الحضانه الاول.
اللي خلاني اتكلم بسبب دعوه الرئيس المستفزه هو و موالسيه من اخبار و اهرام و جمهوريه و احد علماء الازهر و وزير الصحه انه بيقول ان احنا مش عارفين نتقدم عشان عددنا كبير و 80 مليون كتير اوي و ازاي نصرف عليكم و نجيب منين فلوس .
يعني الواضح من الكلام ان احنا نموت الشعب و نخَلص عليه عشان نعرف نعيش كويس زي ما جه في الاخبار ( الجريده ) امبارح ان احنا بنصرف مش عارف كام مليار علي الصحه و كام مليار علي التعليم و النقل و المواصلات
و الدعوه اللي في الجرنان ان عددنا الكبير بيعوق التنميه و لازم نقلل عددنا عشان الفلوس تكفي .
بصراحه معاهم حق بس مش بالطريقه دي .
لأن الشعب مش مسئول عن انخفاض قيمه الجنيه و مش مسئول عن ارتفاع سعر الفول و الطعميه و مش مسئول عن ارتفاع الطماطم و البنزين و السكر و العدس اللي هو ب 9 جنيه دلوقتي.
كان الاولي بدل ما احنا عامليين نصوت من الزياده كنا انشئنا عاصمه جديده علي الاقل كانت هتحل ازمه المواصلات و السكان في القاهره .
نروح نزرع الصحرا بجد بدل ما احنا مدينها للشركات الكبيره.
كنا نزود الدخول بمعدل ثابت مثلا من 25 سنه مش نزودها مره واحده .
و بالمناسبه والدتي علاوتها ال 30 % اللي عاملين عليها قلق و انجاز 70 جنيه مصري فقط لا غير .
مساحه مصر تعتبر مليون كيلو متر مربع و عدد السكان 80 مليون يعني لو قسمنا يكون في كل كيلو مربع 80 فرد
وحيث ان 98% من السكان يقيمون علي 4% من المساحه لازم يكون في ازمه.
يعني لو عملنا فروع عرضيه من النيل و عملنا نهر نيل جديد في الصحراء الغربيه , اعتقد انه هيبقي احسن من مشروع توشكي.
و انا صغير كنت دايما اقرأ علي الطريق السريع عباره لابد ان تترك مسافه 50 متر من حرم الطريق للبناء.
دلوقتي البيوت ومداخله لازقه في الطريق و كل يوم حوادث بالهبل.
اعتقد ان التخطيط السليم للصحراء هو الحل الامثل للتنميه و التقدم و الرخاء

بدايه الطوارئ

شوفتوا ازاي احنا محتاجين الطوارئ و منعرفش ننام من غير من نسمع قصه الطوارئ بالليل و منعرفش ننزل الشارع من غير الطوارئ و منعرفش ندخل الحمام من غير الطوارئ ...ليه بأه ؟؟؟
عشان دي حمايه للمواطنيين الحلوين و الكويسين و الطيبين من المواطنين الاشرار اللي لازم ياخدوا علي دماغهم بالجزمه الجدبده و الكهربه و العصايه ( خوزقه ) .
وطبعا عشان نحتاجه ممكن نعمل حادثه بسيطه اوي زي اللي حصل امبارح في محل المجوهرات باع الزيتون , اتنين رجاله راكبين موتوسيكل و نزلو من المتوسيكل و دخلوا المحل و افلوا الباب و راهم و راحوا مموتين الناس اللي جوه بعد وابل من الرصاص و اسفر عن مقتل صاحب المحل واعوانه .
المهم صاحب المحل مسيحي و اكيد الجناه مسلمين مش عايزه كلام و و اضح ان الغرض ليس السرقه لانهم مسرقوش حاجه.
بس ممكن ان صاحب المحل من الصعيد و عليه تار بايت و دول جم خلصوا عليه من الصعيد برضه


وهذه نص الاخبار المنشوره في المصري اليوم:-


أطلق مجهولان وابلاً من الرصاص علي محل مجوهرات بمنطقة الزيتون وقتلا صاحبه و٣ آخرين وأصيب شخص واحد قبل أن يهربا علي دراجة بخارية.
انتقلت قيادات أجهزة الأمن بإشراف اللواء إسماعيل الشاعر، مساعد أول وزير الداخلية مدير الأمن، وبدأت تمشيط المنطقة، واستجواب شهود العيان، حيث أخطرت شرطة النجدة اللواء فاروق لاشين، مدير الإدارة العامة لمباحث العاصمة، بإطلاق النار ووجود قتلي في محل مجوهرات «كليوباترا» بجوار سينما الزيتون، وهرعت قيادات البحث بقيادة اللواء أمين عز الدين، مدير المباحث،
وتبين من التحقيقات الأولية أن مجهولين في العقد الرابع وصلا إلي محل المجوهرات بشارع كليوباترا المتفرع من ترعة الجبل بجوار السينما، مسلحين بمسدسات وفتحا النيران، مما أسفر عن مقتل صاحبه مكرم عازر وحماية مكرم صليب وأمير ميخائيل وبولس، كما أصيب شخص آخر يدعي زكريا وفيق الطيب، نقل إلي المستشفي.
كشفت المعاينة المبدئية تحطم فاترينة العرض وتناثر قطع مجوهرات مختلطة بدماء الضحايا الذين فوجئوا بالواقعة، وبدأ فريق من المعمل الجنائي رفع البصمات والأدلة التي يمكن أن تفيد في الوصول إلي الجناة.
وتحفظت أجهزة الأمن علي أفراد الحراسة المكلفين بتأمين محال المجوهرات المنتشرة في المنطقة، وبدأت مناقشة شهود العيان الذين أدلوا بمعلومات حول أوصاف منفذي الجريمة،
وقالت مصادر أمنية إن الحادث جنائي وسيتم كشف تفاصيله خلال الساعات القادمة، في حين أرجعت رواية أحد الشهود الجريمة إلي خلافات مالية.
وعلمت «المصري اليوم» أن شاهدي الحادث سيدة تدعي نادية حامد وشاب يدعي «فاضل»، حيث هبط المتهمان من علي الموتوسيكل يرتديان نظارات شمسية كبيرة، وباروكة شعر وترجلا حتي دخلا المحل وأغلقا الباب خلفهما ثم نفذا الجريمة وهربا، حيث طاردهما الشاهد وفشل في اللحاق بهما
http://www.almasry-alyoum.com/article2.aspx?ArticleID=107093

و ليه المصدر الامني اكد ان الحادث جنائي و سيتم الكشف عنه بعد ساعات و ليس ايام
ايه الثقه دي كلها.

انا متاكد ان ممتاز القط هيطلع و يطل علينا من خلال كلام يبقي في اخبار اليوم و يقول شوفتوا بأه الطوارئ ليها لازمه و لا لأه .......... و الايام بيننا

اصله كان محتاج الكاس ده

تواصل القناه التانيه المصريه عكها التلفزيوني من منطلق انها رائده في جميع المجالات بما فيها العك في النقل التلفزيوني و الاخراج ...................................
اتفرجت علي ماتش الزمالك و انبي يوم 25 مايو 2008 (امبارح يعني) و شاءت الاقدار اني اتفرج عليه علي القناه المذكوره بسبب الامتحانات اللي انا فيها .
الحقيقه اني مبتفرجش علي ( التحليل الفني للمباراه ) لأسباب كتير منها علي سبيل المثال:-
1 - لو الاهلي او الزمالك بيلاعب البلديه او السويس و البلديه كسب و السويس اتعادل يقعد بقي الجهبذ اللي طالع في التلفزيون بالفلوس يحلل ليه الاهلي خسر مع ان البلديه اخير الدوري و الاهلي افضل فنيا و الحكم كان مع الاهلي و ميقولوش اي كلمه حق او باطل للبلديه .
في مره لما المحله اتعادل مع الاهلي 2-2 في مصر المحلل اعتقد ( وليد صلاح الدين ) عمال يتنطط ان ازاي المحله تتعادل مع الاهلي وكمان بيقول ان الجون التاني غلطه من مهاجم المحله ( هاني ابو الفضل ) يعني مش قصده و طول وصله التحليل عمال يحلل ليه الاهلي اتعادل و ميقولش مثلا ليه المحله مثلا كان احسن ( مع العلم ان اجوان الاهلي مشكوك فيها و من ضربات جزاء الاولي وهم و التانيه مشكوك فيه ) و الكاميرا تعييد اللقطه و يقول بص يا كابتن اصل لعيب المحله نفخ فيه فالحكم هنا صح و ضربه جزاء 100%
2- ممكن يستضيف مدرب و شغال مع فريقه و يقعد يطلع القطط الفاطسه في المدرب زميله اصل كان لازم يلعت بليبرو
اصل كان يوقف مين مكان مين اصل الخطه مش بتاع اللعيب المصري . طب لما انت عارف كده و عارف كوره الفريق اللي بتدربه بيصارع البقاء ليه.
نيجي بقي للماتش ( حماده امام ) بيذيع و حلوااااااااااا و هجمااااااااااااااااااا و فرصااااااااااااااااااااااااااا و هو اصلا سكران و مش عارف بيذيع لمين لما لعيب من انبي يمسك الكوره علي م يدور علي اسم اللعيب في الورق اللي معاه بتكون الكوره في الجون.
و بعدين كل شويه كل ما الكاميرا تيجي علي ابنه يقعد يشعر فيه هو و اخلاقه و قيادته للفريق و ما تعتزلش يا حازم و شوفوا الناس مقدره حازم ازاي!!!!!!!!!
بعد ما الماتش خلص ( هشام رشاد ) قال كده : مبروك للزمالك و هارد لك لانبي مع ان الفوز ده و الكاس ده مهم لنادي الزمالك و مش مهم اوي لنادي انبي .

هو في ايه بالظبط هو الزمالك لو مخدش الكاس القيامه هتقوم يعني و لا ايه بالظبط
و ام البرنامج بتاعه شويه انحراف ( احتراف ) و امبارح سوبر سبورت يعني كل ماتش باسم جديد للبرنامج.

اتحاد كوره بلدنا

امبارح كان اخر ايام الدوري العام المصري . وطبعا لازم عشان مصريين و بتوع الفهلوه لازم يكون في جمايل و محاباه لبعض الانديه .
و اللي حصل بستاد المقاولون العرب خير دليل و برهان و ان النتيجه لغايه اول ربع ساعه من الشوط التاني 0-0 و اول ما يعلن المذيع الداخلي ان الزمالك خسران يقوم المقاولين يجيب 3 اجوان .
انا مبتكلمش عشان زملكاوي او اهلاوي , بس بصراحه اللي حصل ده مسخره وقله ادب من اتحاد الكوره الموقر .
و ادينا شوفنا حكايه الكتكوت حسن كيتا بتاع اتحاد جده و الحركات الوسخه اللي عملها و القرارات التي اتخذت في لحظاتها بالشطب و الترحيل.
قمه من المسئوليه و الالتزام بالقوانين و اللوائح و برضه اللي بتتطبق علي الكل .
و اظن مفيش اشهر من صابع الاستاذ \ ابراهيم حسن , و حكايه ابو العلا الاخيره (ايقاف 4 شهور)
لأ رجاله فعلا.
كان فيها ايه الاتحاد ينزل و لا المصري و لا المقاولين و لا غزل المحله .
البلد هتوقف ؟؟؟؟؟؟؟؟؟؟؟؟؟؟؟؟؟؟؟
و لا مينفعش ينزلوا عشان دي سياسه يعني الجماهير تسيب الاتحاد وتتفرغ لرغيف العيش و الصرف الصحي
و تقرف في اهالينا و مظاهرات بقي و العك ده
ياساده كره القدم في مصر ليست رياضه بل سياسه لالهاء الشعب .

استهبال القناه الثانية المصريه الارضيه

يوم الاتنين اللي فات القناه التانيه قرفتنا باعلان اذاعه مباره مانشيستر يونايتد و تشيلسي . المهم انا عندي راديو تلفزيون العرب و قلت بدل ما اتفرج عليه قلت اتفرج علي التانيه .
وجه وقت الماتش الساعه عشره الا ربع و افتح التانيه الاقي بيتك بيتك لسه شغال , طب و الماتش
قعدت لغايه الساعه عشره و خمسه بقاوح نفسي اصل الرياده مبتجيش من فراغ و اتفرج علي ال ART المهم لغايه مازهقت وفتحت ال ART و الماتش عدي عليه 22 دقيقه .
مش مشكله عصام الشوالي بيعلق و قلت احسن من اي معلق (بضين) عند الرياده ....انا اسف علي اللفظ....
و انا قاعد مستمتع كده قولت لنفسي ابص علي الرياده و لقيت حاجه جديده اول مره اشوفها في حياتي
الساعه كانت 11:16 دقيقه و الماتش علي الART كان في الدقيقه 73 و علي الرياده 41 .
يعني القناه التانيه ذاعت الماتش بعد ما بدأ بحوالي نص ساعه .
اعتقد اللي حصل ده بسبب البيت بيتك كان محمود سعد مستضيف اعتقد دكتور ....الجندي اعتقد خالد بس مش متاكد
و تقريبا معرفوش ياجلوا اللقاء فعملوا الفعله دي.
بصراحه انا معرفش اذا كانوا اعتذروا عن التاجبل ده ولا لأ بس اللي اعرفه ان ساعه الماتش كانوا يقولوا.

الدروس المستفاده

طبعا احنا لازم عشان نتطور اننا نستفيد من تجارب الاخرين و نبص عملوا ايه صح و ايه غلط .
القصه ان الاسبوعين اللي فاتو حصل حاجات كتير اوي في ميانمار و الصين بمعني اصح كوارث .
يعني حاجه بسيطه من عند ربنا كده اعصار راح معاه الالاف من البشر و كل يوم في ارقام جديده و الناس في العالم بتجمع مساعدات انسانيه و تحذيرات من منظمات الصحه بانتشار الامراض و الاوبئه و الالاف من المشردين و في نفس الاسبوع زلزال بقوه 7.4 ريختر و البيوت هناك تتحمل 7 ريختر بس و شوف اللي حصل مش عارف باين الرقم وصل ل 60000 قتيل صحيح ان نسبتهم متعديش 0.00004 (اربعه من ميت الف) بس الرقم كبير اوي .
ازاي احنا بقي كمصر نستفيد من اللي حصل في مواجهه الكوارث لو حصلت (لا قدر الله ) , فكل مره يحصل زلزال في اي مكان في العالم حتي لو فوق القمر الاخبار علي الاولي و التانيه بتجيب علي التليفون (زي الجزيره ما بتعمل من زمان) السيد رئيس معهد الزلازل بحلوان و تقعد المذيعه تسال فيه قال ايه عشان الشعب يطمن و الراجل كل مره يؤكد ان مصر بعيده عن حزام الزلازل و مفيش خوف و الكلام الفاضي ده.
يعني لو حصل زلزال ذي اكتوبر 1992 (انا كنت في الحضانه ساعتها و كنت مروح البيت 3:15 ) انا فاكر منظر عمري ما انساه ابدا ..... عجوز البيت واقع فوقه و متكوم في زاويه صغيره و الناس عماله تزعق و ناس لابسين برتقاني و الاخبار بتصور و بتحمد ربنا.
اللي انا عاوز اقوله ان لو حصل زلزال زي بتاع الصين و لا اللي بيحصل في تركيا و اليونان
هل احنا قادرين علي مواجهته من حيث الانقاذ و الاسعاف و الاعمار؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
طبعا انا متمناش ان حاجه تحصل زي كده بس لازم نكون واقعيين .
و التاريخ دايما مش في صالحنا في الحاجات دي و اشهر حاجه العباره .
اعتقد ان لازم التليفزيون يعمل برامج توعيه للمواطنين و دورات اسعاف و انقاذ لطلبه الكليات مثلا للتدريب علي مواجه اي كارثه محتمله الوقوع.
زي ما التلفزيون بيعمل كده مع اسال استشير و مصر بتتقدم بينا .

مصر للطيران

تحتفل مصر للطيران بالانضمام لـ Star Alliance في 11 يوليو 2008 و هو التحالف الشهير في مجال النقل الجوي و يتم الانضمام لهذا التحالف عن طريق دعوه شركات الطيران المناسبه لدخول التحالف .
و في ظل الانضمام يجب ان تغيَر مصر للطيران 3% من لوجو الطائرات الي لوجو ستار اليانس.
وقد قامت الشركه بتغيَر شعار حورس العادي الذي نراه الي شكل جديد متطور وجميل

الشكل القديم

و الشكل الجديد

طبعا في فرق في الصورتين واضح و في صالح الجديده
بس المفروض حاجه زي كده يتعلن عنها علي الويب سايت الخاص بمصر للطيران زي ما هي بتعلن دلوقتي في الاخبار و الاهرام.
بس للاسف الويب سايت مازال يحمل الشكل القديم .
بس ممكن يكونوا لسًا مقالوش و ما اقروش الشكل الجديد
يعني مجرد اعلانات بس . بس المفروض حتي يعملوا الموقع تجريبي مثلا.
المهم انها نقله حضاريه للناقل الرسمي بمصر انضمامه لستار اليانس و تجديد الاسطول و الشكل
و الي الامام يا EGYPT AIR

يا لاااهوي

اخبار النهارده من جرنان الاخبار

القبض علي 76 الف مواطن (مجرم) في حمله علي جنوب الصعيد.


نجحت مباحث الاداره العامه لمباحث تنفيذ الاحكام بوزاره الداخليه بالتنسيق مع مديريات أمن اسيوط و سوهاج و قنا والاقصر في تنفيذ 76 الف حكم قضائي بينها احكام تصل للمؤبد.


وتمت احاله المتهمين الي النيابات لاتخاذ الاجراءات القانونيه.


جاءت الحملات المكبره بناء علي توجيهات الوزير حبيب العادلي لتصفيه البؤر الاجراميه في اطار جهود قطاع مصلحه الامن العام بقياده اللواء عدلي فايد مساعد اول الوزير لرفع معدلات تنفيذ الاحكام باعتبارها احد محاور منع الجريمه و تحقيق العداله و رد الحقوق لاصحابها.


اسفرت الحمله عن ضبط 76 الف هارب من احكام قضائيه منهم عدد كبير من العناصر الخطيره في قضايا قتل عمد ومخدرات و حيازه سلاح.


تم التنسيق مع اللواء احمد عبد الوهاب مدير امن سوهاج و اللواء محسن مراد مدير امن اسيوط و اللواء محمد هلال مدير امن قنا و اللواء فراج جبر مدير الاداره العامه لشرطه الاقصر لتوجيه الحمله المكبره بمنطقه جنوب الصعيد .


و قاد الحملات اللواء احمد جمال الدين مدير الاداره العامه لمباحث تنفيذ الاحكام و نائبه اللواء علي السبكي و اللواء بكري الصوفي مدير مباحث سوهاج و اللواء ابراهيم صابر مدير مباحث اسيوط و اللواء محمد بدر مدير مباحث قنا و العميد شافعي حسين مدير مباحث الاقصر .

الخبر ده في صوره انجاز حسب سياق الكلام و فعلا حاجه حلوه.

بس الرقم ده مش كبير اوي 76,000 مواطن في يوم واحد و مطلوبين طيب لازمهم بقي 150,000 جندي امن مركزي و لا مخبر و لا ايه بالظبط

و اول امبارح طبعا الـ76,000 واحد دول كانوا حريين و عايشين طبيعي

طيب ليه ده محصلش من زمان و لا لازم حمله مكبره كل فتره .

اعتقد انه لازم علي الاقل حمله من دول اسبوعيا لتطبيق القانون.

قانون المرور الجديد

يناقش مجلس الشعب اليومين دول قانون جديد للمرور المصري .

الفكره و الله حلوه يعني انك تحبس واحد عشان عمل مخالفه ده شئ جميل لأن احنا شعب بيخاف .

يعني بتاع المكروباص اللي بيوقف يحمَل في وسط الشارع و ينزل الركاب و الناس تقعد تزمر و تنادي وتشتم و في الاخر سواق المكروباص يتخانق مع اللي وراه عشان عكَر مزاج امه علي الصبح و ممكن يفتحله دماغه ما هو الشارع بتاع امه برضه و ك. ام اللي ماشي وراه.

و برضه القانون ده هيحكم ام سواق المكروباص عشان دلوقتي اي ظابط او امين شرطه هيوقفه لمَا يشوف منه مخالفه .

نفس الفكره علي سواق التاكسي بيقف في وسط الشارع و لو انت ماشي مثلا في الحاره اللي في النص (لو في اصلا)

و هو ماشي علي شمالك و واحد شاورله علي الرصيف اللي علي يمينك تلاقيه كسر عليك قوي علشان يلحقك الزبون و يا سلام لو كانت زبونه و يا سلام لو موسعتش ممكن تسمع شتايم جديده .

القانون في امريكا بيحبس مثلا الام لو حاطه ابنها لو اقل من 12 عام جنبها مش ورا علي الكرسي المخصص ليه يعني حكايه الحبس دي مش بدعه.

بس انا افضَل الحبس لسائق الملاكي لإنها سوف تؤثر في نفسية سعادته.

و برضه افضل الغرامه لسائقي الاجره ما هو بيتعب في القرش بس لما تغرمه هيكون اول واحد بيطبق القانون و يحافظ عليه.

في حاجه تانيه الناس اللي بتفكر في القانون و بتحطه مش في بالهم

المفروض انهم يبدأوا من تحت يعني يظبطوا البنيه الاساسيه من طرق و حارات و كباري , و يبدأوا يخلوا الناس يتعودوا للسير في الحارات , مش تلاقي مثلا الطريق حارتين وماشي فيه 4 عربيات جنب بعض 2 في النص و مكروباص علي التراب و نص نقل عايز يعدي و خلاص.

المشكله ان الحاجات دي كلها بنعاني منها و احنا سايقين و ساعات للاسف تلاقي ملاكي و ناس شكلها محترم بتحب تمشي غلط .

وده مثال بسيط ده طريق القاهره الاسكندريه الزراعي و عشان زراعي لازم الطماطم تتفسح عليه و تشم هوا

الراجل البسيط ده مش عارف ان كده ممكن يعرض حياته للخطر .

بالتاكيد عارف..........

بص بقي المكروباص يا عم مستني ان اللي قدامه يتزحزح شويه عشان الغرزه ناقحه عليه و عايز ينتهي.

العمليه سهله مش صعبه بس عايزه شويه ضمير و تحمل مسئوليه و تخطيط سليم من الـ أ الي الـ ي

التخطيط عليه عامل مهم وكبير ماشي في حارات طيب اسأل اي سواق و قله الحارات دي عشان ايه

هيرد عليك ويقولك عشان اخدها في وسط العربيه يبقي اما كده ماشي سليم.

عيب اوي ان السعوديه يبقي عندها طرق نظيفه و احنا لأ .

الصوره دي علي الدائري

لو واحد اجنبي سايق و شاف المنظر ده هيعمل ايه هيقف و لا ايه بالظبط؟؟؟؟؟؟؟؟؟؟؟؟؟؟؟؟؟؟؟؟

القانون حلو وجميل هيظبط شويه المخالفات العاديه .

بس المفروض ان احنا نبدأ من اول المنظومه من تحت خالص من الطرق و البنيه الاساسيه و تعليم اصول القياده مش الفهلوه .

يعني المدرسه بجد تطلع سواق قادر علي مواجه اي ظرف طارق واعي للقانون و حريص علي تطبيقه .

الغردقه و ابو سمبل و اسوان

مطارات الغردقه و ابو سمبل و اسوان مطارات المفروض مدنية و تقع علي خريطه المطارات السياحيه المهمه ليس في مصر وحدها بل العالم اجمع حيث تستقطب الملايين من السياح سنويا.

فمطار الغردقه :-

يستوعب بعد تطويره نحو 7 ملايين راكب سنوياً بدلاً من 3 ملايين راكب اضافة إلى صالات سفر ووصول دولية فقد تمت زيادة مساحة صالة السفر الدولي والمحلي من 495 م2 الى 1400 م2 وزيادة كونترات الخدمة لشركات الطيران لتصبح 18 كونتراً بدلاً من 6 كونترات، وكذلك في صالة الوصول المحلي والدولي تمت زيادة المساحة من 325 م2 إلى 1300 م2 وزيادة الخدمة الى 12 كونتراً بدلاً من 6 كونترات ويعمل بها 12 ضابط جوازات، كما تمت زيادة عدد مواقف انتظار الطائرات الى 38 موقفاً وتم تنظيم موقف انتظار السيارات خارج المطار وأصبح يستوعب 1000 سيارة وأتوبيس بدلاً من 200 فقط، كما زود المطار بطقم ملاحة جديد أمكنه تقليل زمن هبوط الطائرات من 6 دقائق الى 3 دقائق فقط بما يسمح باستيعاب حركة جوية أكبر

و مطار اسوان:-

وصل اليه 9 رحلات طيران منتظم قادمة من مطار القاهرة أقلت 1100 راكب من المصريين والسياح لقضاء اجازتهم.. فيما تم تنظيم خمس رحلات طيران منتظم بين مطاري أسوان وأبوسمبل تقل 700 راكب من المصريين والسياح لمشاهدة المناطق السياحية والمعالم الأثرية بمدينة أبوسمبل السياحية.
تصل خلال الأربع والعشرين ساعة القادمة 11 رحلة طيران منتظم قادمة من مطار القاهرة تقل 1200 راكب من المصريين والسياح لمشاهدة المناطق السياحية والمعالم الأثرية بمدينة أسوان.. وسيتم تنظيم 6 رحلات طيران منتظم بين مطاري أسوان وأبو سمبل تقل 800 راكب من السياح والمصريين لمشاهدة المناطق السياحية والمعالم الأثرية بمدينة أبوسمبل السياحية.
(عن موقع الهيئه العامه للاستعلامات بتاريخ31 مارس 2006 )

اما مطار ابو سمبل :-

فقد استقبل مطار أبوسمبل 13 رحلة طيران داخلية منتظم وشارتر قادمة من القاهرة وأسوان تقل 2100 راكب معظمهم من السائحين الأجانب وغادرته 13 رحلة تقل 2100 راكب.

اي ان مطار الغردقه يخدم 7 ملايين راكب في السنه

و مطار اسوان يخدم حوالي 500000 راكب سنويا

و مطار ابو سمبل يخدم حوالي 800000 راكب سنويا

بافتراض ان مطاري اسوان و ابو سمبل يعملان يوميا بمعدل الركاب المذكور سابقا

المهم اللي انا بحاول اوصله انه الثلاث مطارات دول شغالين 2*1

يعني مطار مدني و مطار حربي عسكري .

و المفروض ان الاماكن العسكريه الحساسه ذي دول ممنوع الاقتراب و التصوير منها

مش ان كل الناس المسافره تتفرج علي الطيارات الحربيه المرابضه (حلوه دي) علي الارض و اللي عاوز يصور يصور و يعمل اللي هو عاوزه عشان مفيش نقطه مراقبه فوق في الجو و مفيش حرس سلاح.

و الصور الاتيه تثبت اللي انا بقوله

مطار ابو سمبل:-

مطار اسوان:-
الصوره من مطار اسوان ويظهر بها طائره مدنيه من طراز(McDonnell Douglas) بالقرب من هناجر الطائرات الحربيه.

مطار الغردقه:-

و الصوره اللي جايه دي للمطار بس من الجو ساعه اقلاع احدي الطائرات و تظهر بها هناجر الطائرات الحربيه

http://www.badongo.com/pic/3531609

عايزييين قااراار

بهذه الكلمتان وقف الالاف من شعب دمياط اليوم امام مبني المحافظه مرددينها باعلي صوت في مظاهره او احتجاج او اعتصام او ايا كان المسمي الامني لها عن وضع شركه اجريوم الكنديه التي تقوم بعمليه انشاء مصنع للبتروكيماويات بمدينه راس البر الساحليه الهادئه الجميله المتطوره حديثا.
بالطبع المشروع ضخم و لا احد ينكر ايجابياته علي الاقتصاد المصري من فوائد ماليه و ماديه.
بعيدا عن عمليه خلق فرص عمل للشباب حيث كما تابعت الموضوع ان حجم العماله سيكون في حدود 250 عامل مصري و بالتأكيد من اصحاب الخبرات او سبقوا وان عملوا بمصانع مشابهه اذا ففرص عمل شباب خريجيين تعتبر معدومه في ظل ايضا ان المصنع للكيماويات و ما ينتج عنها من ابخره و عوادم مضره بالانسان و البيئه.
نرجع للكلمتين راس المقال (عايزييين قااراار) بالطبع الكل يفهم معناها .
و اللي مش فاهم اقوله ان الدمايطه طالبين القرار من الرئيس محمد حسني مبارك , مش من المحافظ او الوزير او رئيس الوزراء ليه!!!!!؟
لأن بالتأكيد ان في ازمه ثقه بين المواطنين و الحكومه او الوزراء و مش عايزيين القرار إلا من الرئيس علشان عارفيين ان مفيش مخلوق هيقدر يغير القرار.

احسن واحد

انا قرأت من كام يوم ان السيد اللواء احمد ضياء الدين (اعتقد) بعد ان اصبح محافظ لاحدي محافظات الوجه القبلي امر بعدم سير موتيسكل (كونستبل) امام الموكب بتاع سيادته.

طبعا الموضوع ده جديد علي الناس ان سيادته بعد كده ممكن ينزل من المحافظه بدون اخطار اي احد حتي ولو كان سكرتير سعادته ويعمل جولات تفتيشيه علي اي حاجه مخابز اعمال بلديه.

الصراحه اننا شُفت الموضوع ده قبل كده بس مع مدير امن الغربيه اللواء\ طه الزاهد .


انا اول مره اشوف راجل محترم اوي زيه كده وانا باعتبره من افضل اللواءات الموجوده في الداخليه واحسن مدير امن في تاريخ محافظه الغربيه.




عشان كده مفيش ظابط في المحافظه كلها بيحبه (مع الاعتذار لسيادته)



المهم ان سيادته بيقوم بجولات في جميع انحاء المحافظه في اي وقت يعني مثلا ممكن يكون في المحله الساعه 2 فجراً و تلاقيه تاني في المحله الساعه 7 صباحا من نفس اليوم .



وفي مره كنت راجع من القاهره وعند حد محافظه الغربيه مع المنوفيه كان في ملف ع الطريق السريع وكان بيلف منه الساعه حوالي 5 العصر.



وهو من النوع اللي مبيحبش المنظره يعني مفيش تشريفه اودامه و لا اي حاجه من المناظر دي يعني بتلاقيه مثلا ماشي بالعربيه لوحده في اي مكان.



المهم ان الكلام اللي انا كتبته ده بيحصل من اول ما مسك الامن في المحافظه

حتي الصور المنشوره اعلاه بثبت الكلام بتاعي و علي فكره الصور دي كانت يوم الاضراب الشهير السادس من ابريل من عام 2008 .

لا في موتسيكل و لا اي حاجه مش زي المحافظ التعبان اللي مشي اللي بيركب الشيروكي و قدامه موتسيكل و عربيه مرور و الكونستبلات يوقفوله الطريق عشان يعدي و يرصفوله الطريق عشان كله يبقي تمام.

الصوره كمان بالسياره القديمه البيجو 405 الشهيره للشرطه , السياره الجديده برضه بيجو بس 307SW موديل 2007 سوداء اللون ونمرتها الغربيه 2 .

يعني مبيهموش المنظر

الف شكر وتقدير للسيد اللواء مساعد وزير الداخليه مدير امن الغربيه\ طه الزاهد

غرائب الارقام و علاقتها بالقدر

الموضوع النهارده ملوش دعوه بالصور المصريه الحلوه و لا الوحشه , حاجه كده خفيفه تروق الدم !!!!!!!!!

... ابراهام لنكن اُنتخب لعضويه الكونجرس عام 1846
... جون كينيدي اُنتخب لعضويه الكونجرس عام 1946

... ابراهام لنكن انتخب رئيساً للولايات المتحده عام 1860
... جون كينيدي انتخب رئيساً للولايات المتحده عام 1960

... كلاهما كانت الحقوق المدنيه علي رأس اهتمامتهما

... كلاهما افتقدا طفلاً خلال الاقامه بالبيت الابيض

... كلاهما انتهت حياتهما بالاغتيال و في الرأس وفي يوم الجمعه

... كلا القاتلين من جنوب الولايات المتحده الامريكيه

... الذي خلف ابراهام لنكن اسمه جونسون (اندرو جونسون)
... الذي خلف جون كينيدي اسمه جونسون (لندون جونسون)

... اندرو جونسون من مواليد 1808
... لندون جونسون من مواليد 1908

... قاتل ابراهام لنكن اسمه جـون ويلكس بوث و ولد عام 1839
... قاتل جون كينيدي اسمه لي هارفي اوزوالد و ولد عام 1939

... كلا القاتلين اسمهما مكون من 15 حرف

... كلا القاتلين اُغتيلا قبل مثولهما للمحاكمه

... سكرتير ابراهام لنكن اسمه كينيدي
... سكرتير جون كينيدي اسمه لـنـكـن

... ابراهام لنكن قُتل برصاصه في الرأس في مسرح اسمه فورد
... جون كينيدي قُتل برصاصه في الرأس و هو يركب سياره ماركه لنكن صنعت بمصانع فورد

... قبل اسبوع من اغتيال ابراهام لنكن كان يزور بلده مونرو بولايه ميريلاند
... قبل اسبوع من اغتيال جون كينيدي كان مع مارلين مـونرو

بسم الله الرحمن الرحيم
(( وما اوتيتم من العلم إلا قليلا ))
صدق الله العظيم
عن مقاله للكاتبه مها عبدالفتاح بجريده الاخبار يوم الاربعاء الموافق 27\1\2004

حملات وزاره الصحه و السكان لمراقبه الاغذيه

النهارده طالعتنا جريده الاخبار بخبر( اعتقد انه مدفوع الثمن ) عن نتائج حملات لوزاره الصحه علي بعض المطاعم و السوبر ماركت و الكافيه في المحافظات المصريه مثل المنوفيه و الغربيه و قسمت نتائج الحمله الي :-
1- منشآت مطابقه للمواصفات .
2- منشآت غير مطابقه للمواصفات .
3- منشآت تم اغلاقها .
و احسن حاجه عملتها الوزاره انها كشفت لنا نحن المواطنون عن اسماء الاماكن التي خضعت للتفتيش و اعتقد ان دي اول مره ان جهه رقابيه تعلن عن اسماء المخالفين!!!!!!!!!
لأن كل مره مثلا الاخبار او الاهرام بتعلن في صفحه الحوادث عن اغلاق مطعم شهير ( س.ص.ع.ل ) بوسط البلد لتقديمه اطعمه فاسده او لحم حمير بدون ذكر اسم المطعم كاملاً .
طيب ما هو المفروض انها تقولو عشان تحذر الناس من المطعم ده و متزودش عدد الضحايا لو صاحبه دفع المعلوم للاجهزه المسئوله .
انا اعتقد ان دي حاجه كويسه طبقا للشفافيه المعلنه و لا مانع ايضا ان تقوم الوزاره بالمرور مره اخري و تعديل الكشف المعلن اذا التزم صاحب المنشآه بالمعايير الموضوعه و الاشتراطات البيئيه حرصا علي سلامه المواطنين.

شاهد الصوره بحجمها الطبيعي ادناه

http://www.badongo.com/pic/3454486

الشافعي بن الدكروري بيه

اتكلم اليوم عن محافظ الغربيه (السابق) السيد اللواء الدكتور المهندس الاستاذ\ الشافعي بك بن سليمان الدكروري
فاتح محافظه الغربيه .
المهم انا مش عايز اجيب في سيره الناس و انمَ فيهم بس في شويه كلام لازم يتقال و انا هاخَص الموضوع ده بالذات عن المحله الكبري.
البلد اللَي عملت مظاهرات في يومي 6 و 7 ابريل 2008 بسبب اياً كان محتاجه الكثير اوي عشان تظبط و اكيد ان سيادته اتشال من المنصب بسبب ذلك الاهمال الفظيع الذي ظهر في الصور المنشوره سواء بالجرائد او الانترنت او المدونات مش بسبب انه معرفش يتعامل مع اعمال العنف و الشغب اللي حصلي في البلد لانه وببساطه مش مدير امن سابق او حالي او مدرس بكليه الشرطه .
سيادته انا مشوفتوش في المحله دي يمكن مره واحده من يوم ما مسك مقاليد الامور و الشارع اللي شوفته فيه كان شارع نادي ضباط الشرطه اللي هو دلوقتي يعتبر احسن شارع في المحله لانه مش متكسر بسبب ام الغاز اللي داخل البلد .

و الصور مبتكدبش يعني شريط القطار اللَي هو المفروض مدخل البلد او بمعني اخر همزه الوصل بين المنصوره ودمياط و بورسعيد بالقاهره و الاسكندريه و باقي محافظات المحروسه بالصوره دي امال البلد من جوه شكلها ايه اذا كان المدخل

فيه زباله يجي بتاع محافظه بالكامل.

انا سمعت طراطيش كلام ان الاستاذ \عمرو اديب والسيد \مفيد فوزي وضبوه كويس في القاهره اليوم بسبب انه بيقول ان البلد ميت فل و اربعتاشر مش مكسره ولا حاجه و ان كانت مكسره ف ده بسبب ان احنا بندخل للبلد غاز طبيعي لراحه المواطنين من الوقوف في طوابير الانابيب , بس انا بعذر سيادته لانه مبيشفش ليه...!!!


عشان كل زياراته معلنه و الشوارع بتترش ميه بالمطافي و البلدورات بتدهن و التكسير اللي في الشارع بيتردم اي كسر


لأ وكمان لأنه راكب جيب شيروكي متفيمه و ستاير فانت عايزه يشوف الناس او يحس بالمطبات او او او ....


صحيح ان البلد بيدخلها غاز عشان راحه المواطنين بس الغاز ده بــ 2300 جنيه شامله مصروفات اصلاح الشوارع المتدغدغه بس هو فين الوضع دلوقتي

اتمني من المحافظ الجديد اللواء عبدالحميد الشناوي الاهتمام شويه بالمحله وخاصه عمليه رصف الطرق و النظافه العامه
مع تمنياتي له بالتوفيق .
الصوره للشافعي الدكروري و هي الصوره الوحيده اللي لقيتها علي الانترنت يعني هاتلاقيها ارشيفيه من يوم ما مسك
و ده دليل ان احنا مبنشفهوش اصلا

باي باي دكروري

اليوم 6/4/2008

اليوم اعتصام العمال في غزل المحله و قد اختارت العمال هذا اليوم من عده اشهر املاً في تحسن الجو الشتوي الممطر و البارد.

ولكن تأتي الرياح بما لا تشتهي السفن حيث نشَطت اليوم رياح خماسينيه ترابيه في ارجاء المحله الكبري قد تعوق عمليه الاعتصام .

صور حصريه للمدونه من المحله

السيد اللواء\ طه الزاهد مدير امن الغربيه و مجموعه من القيادات

الصوره من ميدان الشون قلب المدينهامام قسم ثان المحله (تحت الانشاء من جديد منذ اكثر من عام)

امام مقر الحزب الوطني و مجلس المدينه

امام الحزب الوطني

شارع البحر ( الشارع الرئيسي )

ميدان الشون
و مدير مباحث الغربيه السيد\ سامح رضوان

امام مجلس المحلي الشعبي

تنضيف البلد

النهارده يوم السبت و قبل الاضراب بيوم في المحله الكبري قامت اجهزه المدينه بـ امر عمال البلديه و المجلس المحلي بـ النزول لشوارع المدينه و تنظيفها و تمشيطها و اخلائها من جميع انواع الحجاره و الطوب و الكسر و جميع انواع الاوساخ التي يمكن استخدامها في الاضراب المقبل و ذللك للحفاظ علي الامن العام و منع المتظاهرين من استخدامها في الاعمال التخريبيه .
بصراحه انا اول مره اشوف كده و برضه دي حاجه كويسه و جديده للحفاظ علي الممتلكات العامه و ياريت تفضل موجوده علطول لتطهير المدن و الشوارع منها .

غزل المحله و القوي السياسيه الاخري

يوم الاحد القادم الموافق 6/4/2008 هو يوم الغضب المصري الذي لم يحدث منذ سنوات بعيده بعد ان وصلت الحياه في مصرنا الغاليه الي اقصي مداها .
فبعد التحولات و التغيرات الرهيبه في اسعار كل السلع (و ليس بعضها) الاساسيه و الرفاهيه واتجاهها للصعود دائما و في ظل بقاء الحكومه ساكنه لا تفعل شئ ً في مواجه الاسعار و بالتحجج بان هذه الاسعار هي مثل الاسعار العالميه , كان و لابد من وقوف الشعب المصري في مواجه هذا العبث بمقدراتنا و مقدرات اطفالنا.
لقد اعلن عمال غزل المحله منذ اكثر من شهر مضي وفي ظل اسعار مرتفعه نسبيا ان يوم 6/4/2008 هو يوم اضراب شامل عن العمل لتحقيق المطالب المشروعه في حياه كريمه بعد ان فقدوا الامن و الامان في العيش حياه كريمه في ظل ارتفاع الاسعار.
ولكن التغير اليوم انه و منذ اعلان العمال الاضراب ان الاسعار ظللت ترتفع يوماً بعد يوم فما كان من خيار امام كل القوي السياسيه المعتدله و المرخصه و المحظوره الا الاضراب و لو كان في سبيل امن الدوله او الحبس .
يوم الاربع الماضي 2/4/2008 وقع كل العاملين بالقطاع الحكومي اقرارات بالذهاب للعمل في المواعيد الرسميه و عدم التغيب عن العمل لاي سبباً كان , وتم منع الاجازات العارضه للعاملين ومن سوف يخالف التعليمات سوف يحَول للتحقيق و و و و و ......!!!؟؟؟
وفي اطار اخر قام السيد\محمد حسني مبارك باصدار قرار بالغاء و تعديل بعض التعريفات الجمركيه لبعض السلع مثل الارز و الزبده ووو
أال ايه للحد من ارتفاع الاسعار و السيطره عليها طب لما انتو عارفين ان الاسعار مولعه و الناس بتشتكي كان فين التصرف ده من زمان و لاَ حكمه الرئيس و حنكته السياسه و خوفه علي الشعب مظهرش الا اول امبارح ؟

و لما اتلغت الجمارك اللي هي المفروض قرارات سياديه اثرت علي ميزانيه الدوله ولو كانت الاجابه لأ يبقي كده الحكومات بتسرقنا و احنا اعدين في بيوتنا.

الطرق

الطرق في مصر :-
ان مستوي رقي اي دوله مهما كان وضعها يقاس بسهوله الانتقال داخلها سواء للبشر او البضائع و الحمد لله احنا درسنا و احنا في الابتدائي حلاوه المواصلات في مصر و سهولتها و يسرها و اتساع مجالاتها من نقل بري او نهري او جوي او بحري .
المهم انا عاوز اتكلم النهارده عن الطرق في مصر والسبب اللي خلاني اعمل كده هو ان قبل يوم 15-6-2007 كنت فاكر ان طرقنا مفيش زيها و اللي انت عاوزه اعمله المهم في اليوم ده انا سافرت الي الولايات المتحده الامريكيه و طبعا وصلت للبلد ب الليل ومشوفتش اي طرق عشان كان طالع عيني من السفر الطويل , وبعدين بعد يومين بدات انزل البلد و ساعتها شوفت حاجات غريبه ايشي حارات والناس ملتزمه بيها و حاجه اسمها ستاب ساين (Stop Sign) ده غير الاشارات الالكترونيه الموجوده في كل حته و كمان لوحات ارشاديه بحدود السرعه (Speed Limit) يعني الشارع ده مثلا سرعته 45 ميل في الساعه ومحدش بيشتكي و الناس كلها ملتزمه , لأ وكمان جنب كل مدرسه عمود فيه لمبه صفرا مبتقدش الا لما ساعه دخول و خروج المدارس و دي السرعه عندها بتوصل لـ 15 ميل اداميه بقي .
طبعا لما سقت هناك معرفتش اخلي العربيه في وسط الحاره وكانت بتتطوح مني كأني سكران , بس اتعودت بعد شويه .
فايده الـ ستاب ساين ان في وجود التقاطعات او طريق رئيسي متقاطع مع فرعي في عدم وجود اشارات ضوئيه يتم وضع الـ ستاب ساين اللي بتنظم عمليه دخول الطريق الرئيسي من الفرعي ومكانها عند الناصيه او القاطع بالظبط وساعت ما العربيه تيجي عند الـ ستاب ساين يتم الوقوف تماما (Fully Stop) و النظر يمينا ويسارا ثم العبور الي الجهه اللي عاوزنها.

طبعا الكلام البسيط ده مش موجود في بلد الامن و الامان لان احنا بنتفلسح ( من فعل فلحوس ) علي كل حاجه و احنا وحوش الاسفلت و الحلوه تفاحه للسفر و السياحه و لو باض الديك هعديك و الكلام ده كله اللي بنقراه علي الميكروباص و التوك توك .
وفي الاخر نلاقي النتيجه 20 قتيل و 500 مصاب في حادث تصادم توك توك بـ توك توك اخر
و الاخبار تسَرخ و الاهرام تنعي و الجمهوريه تسَب و تلعن ام السرعه الجنونيه و رعونه السائقين اللي خلت الناس دي تموت و نسيب بقي كل حاجه زي :-
1- فين الحارات الواضحه علي الطريق.
2- فين ادارات المرور المسئوله عن تعليم الناس طرق القياده الصحيحه و الارشادات و العلامات الضوئيه.
3- فين القانون وتطبيقه و الالتزام بالحارات و الاشارات .
4- الناس اللي بتمشي عكس الاتجاه اللي بتعرض حياتها للخطر و حياه الاخرين فين القانون اللي بيعاقبهم ( هناك في امريكا
عقوبه اي حاجه زي عكس الاتجاه او الحزام او كسر اشارات المرور او موقفتش في الـ ستاب ساين الحبس حسب الفعل
المرتكب او سحب الرخص لمدد طويله او اعاده ارسال الجاني الي مدرسه القياده من جديد )
و اعتقد ان انا عندي بعض الحلول وهي :-
1- تفعيل قانون لا يرحم اي مخطئ حتي لو كان وزير.
2- بناء مدن مروريه محاكيه للطبيعه .
3- تفعيل طرق جديده لتعليم القياده من اشارات و حركه و ذوق و اخلاق من خلال امتحانات
عملي و نظري للتأكد من قدره الشخص علي القياده و فهمه للاشارات و حرصه علي تطبيقها.
4- لابد من المتقدمين لرخص القياده الانتساب لمدرسه المرور او الترخيص لبعض المكاتب
المتخصصه بشرط تطبيق المعايير المناسبه للحصول علي قائد سياره محترف.
و مش معقول ان الكلام ده مش مفهوم لان دي اساسيات في اي دوله في العالم . وكمان مش معقول ان دكاتره كليات الهندسه و التخطيط مش عارفين الكلام ده .

وانا عايز خبير يشرحلي الصوره دي..................

الصوره دي علي الطريق الدائري وانا جاي من الفيوم .
انا ماشي ف الحاره بتاعي و قابلني سهم اتجاه في عكس طريقي .
الصوره مهداه الي كل الناس اللي بتسوق في مصر................!!!!!!!!!!!!!!!!!!!؟؟؟؟؟؟؟؟؟؟؟؟؟؟

ميناء الاسكندريه:-

منظر عام للميناء ويوضح بعض القطع البحريه و قصر راس التين

يظهر بالصوره 4 غواصات كذلك العديد من القطع الاخري